પ્રધાનમંત્રી નરેન્દ્ર મોદીએ આજે ટેસ્લા તથા સ્પેસએક્સના માલિક ઈલોન મસ્ક સાથે ફોન પર મહત્વપૂર્ણ ચર્ચા કરી હતી. આ વાતચીત દરમિયાન એવિએશન, ઈલેક્ટ્રિક વાહનો, નવીન ટેકનોલોજી અને અવકાશ ક્ષેત્રે સહયોગની શક્યતાઓ અંગે ચર્ચા કરવામાં આવી છે. પીએમ મોદીએ કહ્યું કે વાતચીત મુખ્યત્વે આ વર્ષની શરૂઆતમાં વોશિંગ્ટન ડીસીમાં થયેલી મુલાકાત દરમિયાન ચર્ચાયેલી બાબતો પર આધારિત રહી છે. તેમણે સોશિયલ મીડિયા પ્લેટફોર્મ 'X' પર જણાવ્યું કે ભારત ટેકનોલોજી અને નવીનતાના ક્ષેત્રમાં અમેરિકા સાથે ભાગીદારી મજબૂત કરવા માટે પ્રતિબદ્ધ છે.

આ વાતચીત એવા સમયે થઈ છે જ્યારે ઈલોન મસ્કની કંપનીઓ ટેસ્લા અને સ્ટારલિંક ભારતમાં પ્રવેશ કરવાની તૈયારીમાં છે. ટેસ્લા ભારતમાં ઇલેક્ટ્રિક વાહનોનું ઉત્પાદન શરૂ કરવા માટે સરકાર સાથે વાર્તાલાપ કરી રહી છે. બીજી બાજુ, સ્ટારલિંક ભારતમાં સેટેલાઇટ આધારિત ઇન્ટરનેટ સેવા શરૂ કરવા માટે એરટેલ અને જીઓ જેવી કંપનીઓ સાથે ભાગીદારી કરવા માંગે છે. આ વાતચીત પછી મસ્કની ભારતમાં એન્ટ્રીની સંભાવના વધુ મજબૂત બની ગઈ છે.

પ્રધાનમંત્રી મોદી અને મસ્કની છેલ્લી મુલાકાત ફેબ્રુઆરીમાં યુનાઇટેડ સ્ટેટ્સમાં થઈ હતી, જ્યાં બંને નેતાઓએ ઈલેક્ટ્રિક વાહનો, નવીનીકરણીય ઊર્જા અને અવકાશના ઉદયમાન ક્ષેત્રોમાં સહયોગ વધારવા અંગે ઉત્સાહભેર ચર્ચા કરી હતી. આ મુલાકાત દરમિયાન PM મોદીએ મસ્કના ત્રણ બાળકોને ભારતીય સાહિત્યની પુસ્તકો ભેટમાં આપી હતી જેમાં રવીન્દ્રનાથ ટાગોરની ધ ક્રેસન્ટ મૂન, આર.કે. નારાયણનું ધ ગ્રેટ આર.કે. નારાયણ કલેક્શન અને પંડિત વિષ્ણુ શર્માનું પંચતંત્ર શામેલ હતું. બાદમાં સોશિયલ મીડિયામાં એક તસવીર પણ શેર કરવામાં આવી હતી જેમાં બાળકો આ પુસ્તકો વાંચી રહ્યા છે.

ઈલોન મસ્ક સાથેની મુલાકાત પછીની એક પોસ્ટમાં, પીએમ મોદીએ લખ્યું હતું કે વોશિંગ્ટન ડીસીમાં એલોન મસ્ક સાથે ખૂબ જ સારી વાતચીત થઈ. અમે અવકાશ, ગતિશીલતા, ટેકનોલોજી અને નવીનતા સહિતના વિવિધ મુદ્દાઓ પર ચર્ચા કરી જે બધામાં ઈલોન ખાસ રસ ધરાવે છે. મેં તેમને ભારતના સુધારાઓ અને 'લઘુત્તમ સરકાર, મહત્તમ શાસન' ની નીતિ વિશે પણ માહિતી આપી.