BREAKING NEWS

મોહમ્મદ શમીએ IPLમાં પોતાની ટીમ બદલી, જાણો કેટલા કરોડ રૂપિયા મળ્યા

  • November 17, 2026 04:25 PM 
Aajkaal Daily (Desh Pardesh Ni Aajkaal)

આઈપીએલ 2027ના મીની ઓક્શન અને રિટેન્શનની અંતિમ તારીખ પહેલા ટ્રેડ વિન્ડોમાં એક મોટો અને ચોંકાવનારો ફેરફાર જોવા મળ્યો છે. ભારતીય ક્રિકેટ ટીમના અનુભવી અને સ્ટાર ફાસ્ટ બોલર મોહમ્મદ શમીએ આગામી સીઝન માટે પોતાની ટીમ બદલી નાખી છે. લખનૌ સુપર જાયન્ટ્સનો સાથ છોડ્યા બાદ હવે શમી આગામી આઈપીએલ સીઝનમાં રાજસ્થાન રોયલ્સની જર્સીમાં વિરોધી ટીમના બેટ્સમેનોની વિકેટો ઉખેડતો જોવા મળશે. 17 નવેમ્બરના રોજ રિટેન્શનના છેલ્લા દિવસે થયેલા આ મોટા ટ્રેડ સોદાએ ક્રિકેટ જગત અને આઈપીએલ બજારમાં ભારે ગરમાવો લાવી દીધો છે.


આ ટ્રેડ ડીલમાં સૌથી વધુ ચર્ચા શમીની ફીને લઈને થઈ રહી છે. અગાઉ લખનૌ સુપર જાયન્ટ્સે મોહમ્મદ શમીને રૂ.10 કરોડની મોટી રકમમાં પોતાની ટીમ સાથે જોડ્યો હતો. જોકે, હવે આ નવા કરાર મુજબ શમી રૂ.8 કરોડની સુધારેલી ફી સાથે રાજસ્થાન રોયલ્સની ટીમમાં સામેલ થયો છે. એટલે કે, રાજસ્થાનમાં જોડાવા માટે તેની ફીમાં રૂ.2 કરોડનો ઘટાડો નોંધાયો છે. તેમ છતાં, રાજસ્થાન રોયલ્સ માટે શમી જેવો અનુભવી બોલર ટીમમાં આવવો એ ખૂબ જ મોટી સફળતા માનવામાં આવી રહી છે.


રાજસ્થાન રોયલ્સના બોલિંગ આક્રમણને મોહમ્મદ શમીના આગમનથી જબરદસ્ત મજબૂતી મળશે. શરૂઆતની ઓવરોમાં નવા બોલને બંને તરફ સ્વિંગ કરવાની અને અંતિમ એટલે કે ડેથ ઓવરોમાં સચોટ યોર્કર ફેંકવાની શમીની ખાસ આવડત રાજસ્થાનની જીતમાં ખૂબ જ મહત્વપૂર્ણ ભૂમિકા ભજવી શકે છે. શમીના આઈપીએલ આંકડાઓ પર નજર કરીએ તો, તેણે અત્યાર સુધીમાં કુલ 132 આઈપીએલ મેચો રમી છે, જેમાં તેણે શાનદાર પ્રદર્શન કરતા 145 વિકેટ પોતાના નામે કરી છે.


બીજી તરફ, આ ટ્રેડ પ્રક્રિયા હેઠળ રાજસ્થાન રોયલ્સે પોતાના એક મહત્વના ખેલાડીને ટીમમાંથી મુક્ત પણ કર્યો છે. શમી (અને સિદ્ધાર્થ) ને ટીમમાં સામેલ કરવાની સાથે જ રાજસ્થાન રોયલ્સે ઇંગ્લેન્ડના સ્ટાર ઓલરાઉન્ડર સેમ કરનને લખનૌ સુપર જાયન્ટ્સને ટ્રેડ કરી દીધો છે. આ ડીલ મુજબ સેમ કુરન હવે આગામી સીઝનમાં લખનૌ સુપર જાયન્ટ્સ તરફથી તેની વર્તમાન ફી રૂ.2.4 કરોડમાં રમતો જોવા મળશે.


સેમ કરનની આઈપીએલ કારકિર્દી પણ ઘણી પ્રભાવશાળી રહી છે, જેમાં તેણે અત્યાર સુધી 59 વિકેટ ઝડપી છે અને બેટિંગમાં 997 રન બનાવ્યા છે. મેચમાં દબાણની પરિસ્થિતિ હેઠળ બોલિંગમાં વિવિધતા લાવવાની અને નીચલા ક્રમમાં બેટિંગ કરતા ઝડપથી રન બનાવવાની કુરનની ક્ષમતા લખનૌની ટીમને એક સારું સંતુલન પૂરું પાડશે. આમ, બંને ટીમોએ પોતાની જરૂરિયાત મુજબ આ મોટા ખેલાડીઓની અદલાબદલી કરીને આગામી સીઝન માટેની તૈયારીઓ તેજ કરી દીધી છે.



લાઈક અને ફોલો કરો અમારું ફેસબુક પેજ FACEBOOK - AAJKAALDAILY


ફોલો કરો અમારું ઇન્સ્ટાગ્રામ INSTAGRAM - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  99251 12230  

View News On Application