અમદાવાદ શહેરમાં સતત વરસી રહેલા આફતરૂપી ભારે વરસાદને કારણે અનેક વિસ્તારોમાં જળબંબાકારની ગંભીર સ્થિતિ સર્જાઈ છે. ખાસ કરીને શહેરના પોશ ગણાતા એસ.જી. હાઈવે નજીક આવેલા કર્ણાવતી ક્લબની પાછળના ભાગમાં સ્થિત અનેક રહેણાંક સોસાયટીઓમાં વરસાદી પાણી ફરી વળ્યા છે. સમગ્ર વિસ્તાર પાણીમાં ગરકાવ થઈ જતાં સ્થાનિક રહીશો ઘરોમાં ફસાયા છે અને તેમનું જનજીવન સંપૂર્ણપણે ઠપ્પ થઈ ગયું છે.

કર્ણાવતી ક્લબ પાછળ આવેલી સોસાયટીઓમાં ચારેય તરફ પાણી ભરાઈ જવાના કારણે લોકો ઘરોમાંથી બહાર નીકળી શકે તેવી સ્થિતિ રહી નથી. નીચાણવાળા ભાગોમાં ઘૂંટણસમાથી લઈને કમરડોબ પાણી ભરાઈ જતાં સ્થાનિક વહીવટી તંત્ર માટે પણ રાહત કામગીરી પડકારજનક બની હતી. આ પરિસ્થિતિને ધ્યાનમાં રાખીને ફસાયેલા નાગરિકોને સહીસલામત બહાર કાઢવા માટે તાત્કાલિક ધોરણે ભારતીય સેના (આર્મી)ની મદદ લેવામાં આવી છે.

૫૦થી વધુ જવાનો અને બોટ મારફતે રેસ્ક્યૂ કામગીરી

સ્થાનિકોના બચાવ કાર્ય માટે ૫૦થી વધુ આર્મીના જવાનોની ટીમ ઘટનાસ્થળે પહોંચી ગઈ છે. આર્મીના જવાનોને પાંચ જેટલી ટ્રકોમાં ભરીને અસરગ્રસ્ત વિસ્તારમાં ઉતારવામાં આવ્યા છે. સેનાના જવાનો બે ખાસ રેસ્ક્યૂ બોટ અને લાઈફ જેકેટની મદદથી પાણીમાં ઉતરીને સ્થાનિક લોકોને સુરક્ષિત સ્થળે ખસેડી રહ્યા છે. ખાસ કરીને વૃદ્ધો, મહિલાઓ અને બાળકોને પ્રાથમિકતા આપીને પાણીમાંથી બહાર કાઢવામાં આવી રહ્યા છે. સેનાના આ ઝડપી અને સરાહનીય પગલાંથી સ્થાનિક લોકોએ રાહતનો શ્વાસ લીધો છે.