ગઈકાલે લઘુતમ તાપમાનમાં સામાન્યથી બે ડિગ્રીનો ઘટાડો થયા પછી આજે અત્યંત મામુલી વધઘટ તાપમાનમાં જોવા મળી છે. અમદાવાદ ડીસા ગાંધીનગર વડોદરા અમરેલી ઓખા અને વેરાવળમાં લઘુતમ તાપમાનનો પારો ઊંચે ચડ્યો છે અને તેના કારણે ઠંડી ઘટી છે. જ્યારે રાજકોટ પોરબંદર દ્વારકા નલિયા ભુજ અને સુરતમાં લઘુતમ તાપમાન સામાન્યથી એકાદ ડિગ્રી જેટલું નીચે ઉતર્યું હોવાથી ઠંડી થોડી વધી છે.
લઘુતમ તાપમાનમાં સામાન્ય વધઘટ વચ્ચે પવનની ગતિ વધી ગઈ છે અને સરેરાશ 12 થી 15 કીલોમીટરની ઝડપે પવન ફૂંકાય છે. ભારે પવનને કારણે આજે સતત બીજા દિવસે ગિરનાર રોપવે બંધ રાખવામાં આવ્યો છે.
ગિરનાર પર્વત ઉપર આજે લઘુતમ તાપમાન 12.3 અને જુનાગઢ શહેરમાં 17.3 ડીગ્રી નોંધાયું છે.
નલિયામાં ગઈકાલે 9.8 ડિગ્રી લઘુતમ તાપમાન નોંધાયા પછી આજે તેમાં બે ડિગ્રી જેટલો ઘટાડો થયો છે અને આજનું લઘુતમ તાપમાન 7.2 ડિગ્રી નોંધાયું છે. નલિયા સિવાય સમગ્ર રાજ્યમાં લઘુતમ તાપમાન ડબલ ફિગરમાં નોંધાયું છે.
આજે ભુજમાં એક ડિગ્રીના ઘટાડા સાથે 12.6 રાજકોટમાં સામાન્ય ઘટાડા સાથે 11.2 પોરબંદરમાં 14.3 ભાવનગરમાં 15.6 ડિગ્રી લઘુતમ તાપમાન રહ્યું છે અમરેલીમાં એક ડિગ્રીના વધારા સાથે આજે 15.2 ઓખામાં સામાન્ય વધારા સાથે 19.8 અને વેરાવળમાં પણ સામાન્ય વધારા સાથે 16.8 ડીગ્રી લઘુતમ તાપમાન રહ્યું છે.
અમદાવાદમાં આજનું લઘુતમ તાપમાન 15.7 ડીસામાં 14.1 ગાંધીનગરમાં 13.5 વડોદરામાં 15.8 ડિગ્રી લઘુતમ તાપમાન નોંધાયું છે.