ગાંધીનગરના પ્રખ્યાત એસ.જી. હાઇવે પર સરગાસણ બ્રિજ નજીક ગત રાત્રે દારૂના નશામાં ધૂત નબીરાઓએ બેફામ ગતિએ ગાડીઓ દોડાવીને ભારે આતંક મચાવ્યો હતો. કાયદાના કોઈ પણ ડર વગર રફતારના રોમાંચમાં રાચતા એક નબીરાએ પોતાની લક્ઝરી કાર પરથી કાબૂ ગુમાવતા હાઇવે પર એક પછી એક એમ ચાર-ચાર વાહનો વચ્ચે ગમખ્વાર અકસ્માત સર્જાયો હતો. મોડી રાત્રે બનેલી આ ઘટનાને પગલે હાઇવે પરથી પસાર થતા અન્ય નિર્દોષ વાહનચાલકોના જીવ તાળવે ચોંટી ગયા હતા અને સમગ્ર વિસ્તારમાં અફરાતફરીનો માહોલ સર્જાયો હતો.

ધડાકાભેર સર્જાયો અકસ્માત: એક પછી એક ચાર વાહનો ભટકાયા

ઘટનાની વિગત મુજબ, સરગાસણ બ્રિજ નજીકથી પસાર થઈ રહેલી એક પૂરપાટ ઝડપે આવતી કારના ચાલકે દારૂના નશામાં અંધ બનીને આગળ જઈ રહેલી એક ઇલેક્ટ્રિક (EV) કારને પાછળથી જોરદાર ટક્કર મારી હતી. આ ટક્કર એટલી પ્રચંડ અને ભયાનક હતી કે ઇલેક્ટ્રિક કાર હવામાં ફંગોળાઈ ગઈ હતી અને તેની આગળ ચાલી રહેલી ટોયોટા ઈનોવા કાર સાથે ધડાકાભેર અથડાઈ હતી. આ સાંકળ અકસ્માતમાં અન્ય એક વાહન પણ લપેટામાં આવી ગયું હતું. આ વિચિત્ર અને ગમખ્વાર અકસ્માતને કારણે હાઇવે પર વાહનોના ડૂચા વળી ગયા હતા અને ટ્રાફિક જામની ગંભીર સ્થિતિ સર્જાઈ હતી.

જોતજોતામાં કાર ભડભડ સળગી: એક વ્યક્તિ ગંભીર

અકસ્માત એટલો ભયંકર હતો કે ટક્કર વાગ્યાની ગણતરીની મિનિટોમાં જ અકસ્માત સર્જનાર ક્રેટા કારમાં અચાનક શોર્ટ સર્કિટ અથવા ઈંધણ લીકેજના કારણે ભીષણ આગ ફાટી નીકળી હતી. જોતજોતામાં આખી કાર અગનગોળામાં ફેરવાઈ ગઈ હતી અને બળીને ખાખ થઈ ગઈ હતી. સદનસીબે, કારમાં સવાર નબીરાઓ આગ પકડાય તે પહેલાં સમયસર બહાર નીકળી જવામાં સફળ રહ્યા હતા, જેના કારણે એક મોટો અનર્થ ટળ્યો હતો. જો કે, આ અકસ્માતની ઝપેટમાં આવેલા અન્ય એક વાહનના ચાલક અથવા મુસાફરને અત્યંત ગંભીર ઈજાઓ પહોંચી હોવાના અહેવાલ છે, જેને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે.

પોલીસ અને ફાયર બ્રિગેડની ટીમ ઘટનાસ્થળે

આ ભયાનક ઘટનાની જાણ થતાં જ ફાયર બ્રિગેડની ટીમ તુરંત ઘટનાસ્થળે દોડી આવી હતી અને ક્રેટા કારમાં લાગેલી ભીષણ આગ પર પાણીનો મારો ચલાવી કાબૂ મેળવ્યો હતો. અકસ્માત અંગે માહિતી આપતા ગાંધીનગર ટ્રાફિક પીઆઈ પી. પી. પરમારે જણાવ્યું હતું કે, 'અકસ્માતની જાણ થતાં જ ટ્રાફિક પોલીસની ટીમ તુરંત હાઇવે પર પહોંચી ગઈ હતી અને અકસ્માતગ્રસ્ત વાહનોને બાજુ પર ખસેડી ટ્રાફિક હળવો કરવાની કામગીરી હાથ ધરી હતી. આ અકસ્માત અને નશાખોર ચાલકો સામે કાયદેસરની કાર્યવાહી કરવાની તમામ બાબત સ્થાનિક પોલીસ સ્ટેશન સંભાળી રહી છે અને તેઓ આગળની તપાસ ચલાવી રહ્યા છે.'

હાલમાં ગાંધીનગરની સ્થાનિક પોલીસે દારૂ પીને બેફામ ગાડી ચલાવતા નબીરાઓ સામે ગુનો નોંધી, મેડિકલ ટેસ્ટ સહિતની કાયદેસરની કડક કાર્યવાહી હાથ ધરી છે.