નવી દિલ્હીના જંતર-મંતર ખાતે તાજેતરમાં થયેલા વિરોધ પ્રદર્શન દરમિયાન ઘાયલ થયેલા લોકોના મેડિકલ રિપોર્ટ જાહેર કરવામાં આવ્યા છે. જેમાં એક પ્રદર્શનકારીનો કાન કપાઈને જમીન પર પડ્યો હતો. આ બાબતે પોલીસે પેલેટ ગન ચલાવ્યાનો ઈનકાર કરી રહી છે પરંતુ હોસ્પિટલના રિપોર્ટમાં પેલેટ ગન ચલાવ્યાની પુષ્ટિ કરવામાં આવી છે.

આ રિપોર્ટ્સ પુષ્ટિ કરે છે કે પ્રદર્શનકારીઓ સામે પેલેટ ગન અને રબર બુલેટનો ઉપયોગ કરવામાં આવ્યો હતો. જોકે, દિલ્હી પોલીસ સત્તાવાર રીતે આ વાતનો ઇનકાર કરે છે, જ્યારે સેન્ટ્રલ રિઝર્વ પોલીસ ફોર્સ (સીઆરએફપીએફ)એ આ મુદ્દે મૌન જાળવી રાખ્યું છે.

રામ મનોહર લોહિયા (આરએમએલ) અને સફદરજંગ હોસ્પિટલોમાંથી જારી કરાયેલા કેટલાક ઘાયલોના મેડિકલ-લીગલ કેસના રિપોર્ટ્સની સમીક્ષા કરી છે, જેમાં અનેક ચોંકાવનારા તારણો બહાર આવ્યા છે. આરએમએલ હોસ્પિટલમાંથી જારી કરાયેલા ટોપ્પો નામની મહિલા પ્રદર્શનકારીના રિપોર્ટમાં શંકાસ્પદ ગોળીબારની ઇજાઓનો ઉલ્લેખ છે. ટોપ્પો દાવો કરે છે કે તેણીને રબર બુલેટ વાગી હતી.

સફદરજંગ હોસ્પિટલમાં દાખલ કરાયેલા 28 વર્ષીય પત્રકારના રિપોર્ટમાં તેના કમર અને હાથ પર પેલેટ ગનથી ઇજાઓના નિશાન નોંધાયેલા છે. રિપોર્ટમાં સ્પષ્ટપણે જણાવાયું છે કે, જંતર-મંતર પર સાંજે ચાર વાગ્યે પેલેટ ગનથી શારીરિક હુમલો થયો હતો. પત્રકારના જણાવ્યા મુજબ, ડોકટરોએ તેમને કહ્યું છે કે તેમના શરીરમાં અનેક ગોળીઓ વાગી છે, જે મોટી સંખ્યામાં હોવાથી સર્જરી દ્વારા કાઢવી મુશ્કેલ બનશે.

૧૯ વર્ષીય સાહિલની આંખમાં ઈજા પહોંચી છે અને સાહિલ લોચબ એઈમ્સમાં સારવાર હેઠળ છે. તેમના કાકા અજયે જણાવ્યું હતું કે સાહિલની જમણી આંખમાં એક ગોળી વાગી છે, જેના કારણે ખંજવાળ આવી રહી છે અને બીજી સર્જરીની જરૂર છે. વધુમાં, તેમના ચહેરા, ગરદન, છાતી અને પેટમાં અનેક ગોળીઓ વાગી છે. સાહિલની માતા એક સામાન્ય મજૂર તરીકે કામ કરે છે, અને તેમના પિતા કેબ ડ્રાઇવર છે.

લેડી હાર્ડિંગ મેડિકલ કોલેજમાં દાખલ મન્સૂરીએ જણાવ્યું હતું કે તેમના ચહેરા અને ગરદનમાંથી ગોળીઓ કાઢવા માટે તેમણે બે સર્જરી કરાવી હતી. તેમણે કહ્યું, કનોટ પ્લેસમાં મેકડોનાલ્ડ્સ પાસે મારા પર હુમલો થયો હતો. ટીયર ગેસના શેલ ફૂટ્યા પછી, એવું લાગ્યું કે મારો ચહેરો બળી રહ્યો છે.

ટોપ્પોએ કહ્યું કે પોલીસ ટીયર ગેસના શેલ અને બંદૂકો ચલાવી રહી હતી. તે ભાગી જાય તે પહેલાં, એક રબરની ગોળી તેના જમણા કાનમાં વાગી, જેના કારણે તેના કાનની બુટ્ટી અને બુટ્ટીનો એક ભાગ તૂટી ગયો અને જમીન પર પડી ગયો હતો.

દિલ્હી પોલીસે પેલેટ અથવા રબર ગનનો ઉપયોગ કરવાનો સ્પષ્ટ ઇનકાર કર્યો છે. પોલીસ મુખ્યાલયના એક વરિષ્ઠ અધિકારીએ જણાવ્યું હતું કે, રેપિડ એક્શન ફોર્સ (આરએએફ) પાસે પેલેટ ગન સહિત રમખાણો વિરોધી સાધનો છે. તેઓ વિરોધ દરમિયાન તે લઈ ગયા હશે, પરંતુ અમે સીઆરપીએફ અને તેમના શસ્ત્રો પર ટિપ્પણી કરી શકતા નથી.

બીજી બાજુ, આરએએફના મૂળ સંગઠન સીઆરપીએફએ કોઈ સત્તાવાર ટિપ્પણી કરવાનો ઇનકાર કર્યો હતો. જોકે, સીઆરપીએફના એક વરિષ્ઠ અધિકારીએ નામ ન આપવાની શરતે કહ્યું હતું કે, આરએએફને પેલેટ ગન સહિત રમખાણો વિરોધી સાધનો રાખવાનો અધિકાર છે. તેઓએ ભીડને નિયંત્રિત કરવા માટે તેનો ઉપયોગ કર્યો હોઈ શકે છે.