લખનૌમાં ફિલ્મ 'બડે મિયાં છોટે મિયાં'ના પ્રમોશન ઈવેન્ટમાં બબાલ

લોકોએ ચપ્પલ ફેક્યા તો પોલીસે કર્યો લાઠીચાર્જ , ભીડ બેકાબુ બનતા હંગામો થયો

બોલિવૂડ એક્ટર અક્ષય કુમાર અને ટાઈગર શ્રોફ આ દિવસોમાં તેમની આગામી ફિલ્મ 'બડે મિયાં છોટે મિયાં'ને લઈને ચર્ચામાં છે. આ દરમિયાન ફિલ્મને લઈને એક મોટા સમાચાર સામે આવ્યા છે. અક્ષય અને ટાઈગર પોતાની ફિલ્મના પ્રમોશન માટે લખનૌ પહોંચ્યા હતા અને આ દરમિયાન હંગામો થયો હોવાની વાત સામે આવી છે. લખનૌમાં અક્ષય કુમાર અને ટાઈગર શ્રોફ ફિલ્મનું પ્રમોશન કરી રહ્યા હતા ત્યારે ચાહકોએ તેમના પર ચપ્પલ ફેંકવાનું શરૂ કરી દીધું હતું. જે બાદ પોલીસે ભીડ પર લાઠીચાર્જ કર્યો હતો.

ફિલ્મ બડે મિયાં છોટે મિયાંના પ્રમોશન માટે લખનૌના ઘંટાઘર ચોક મેદાન પર પહોંચેલા અભિનેતા અક્ષય કુમાર અને ટાઈગર શ્રોફની ઈવેન્ટમાં હંગામો થયો હતો. તે અહીં ફિલ્મના પ્રમોશન માટે આવ્યો હતો, આ દરમિયાન તેના ચાહકો તેને જોવા માટે આતુર બની ગયા હતા, ત્યારબાદ ભારે ભીડને કારણે દર્શકોમાં ભાગદોડ મચી ગઈ હતી. જેના કારણે અરાજકતાનો માહોલ સર્જાયો હતો. આ બાદ પોલીસે સ્થિતિને કાબૂમાં લેવા માટે લાઠીચાર્જ કરવો પડ્યો હતો.

કહેવામાં આવી રહ્યું છે કે જ્યારે અભિનેતા ફિલ્મનું પ્રમોશન કરી રહ્યા હતા ત્યારે ચાહકોએ તેમના પર ચપ્પલ ફેંકવાનું શરૂ કરી દીધું હતું. પોલીસના લાઠીચાર્જનો વીડિયો હાલ સોશિયલ મીડિયા પર વાયરલ થઈ રહ્યો છે.  

મળતી માહિતી મુજબ લખનૌમાં બોલિવૂડ ફિલ્મ બડે મિયાં છોટે મિયાંનું પ્રમોશન ચાલી રહ્યું હતું. અક્ષય કુમાર અને ટાઈગર શ્રોફ પ્રમોશન માટે આવવાના સમાચાર મળતા જ મોટી સંખ્યામાં લોકો સ્થળ પર એકઠા થઈ ગયા હતા. મોટી સંખ્યામાં લોકો ત્યાં પહોંચ્યા પરંતુ ભીડ કાબૂ બહાર થવા લાગી. ભીડ જોરથી બૂમો પાડવા લાગી. થોડી જ વારમાં મામલો ધક્કા-મુક્કીમાં ફેરવાઈ ગયો.

મનપસંદ ફિલ્મ સ્ટાર્સની એક ઝલક મેળવવા માટે બપોરથી જ હજારોની ભીડ એકત્ર થવા લાગી હતી. નિર્ધારિત સમય કરતાં લગભગ એક કલાક મોડા પહોંચેલા ફિલ્મ સ્ટાર્સને જોઈને ભીડ કાબૂ બહાર જવા લાગી હતી. આવી સ્થિતિમાં પોલીસે લાઠીચાર્જ કર્યો હતો. આનાથી ગુસ્સે થયેલ લોકોએ સ્ટેજ પર હાજર સ્ટાર્સ તરફ જૂતા અને ચપ્પલ ફેંકવાનું શરૂ કર્યું. જોકે, બાઉન્સરો અને પોલીસકર્મીઓએ કોઈક રીતે પરિસ્થિતિને સંભાળી હતી. ખાસ વાત એ હતી કે આવી પરિસ્થિતિ છતાં પણ પ્રમોશનનો કાર્યક્રમ ચાલુ રહ્યો હતો.