પહેલગામમાં કરવામાં આવેલા આતંકવાદી હુમલા અને 26 નિર્દોષોની હત્યા બાદ સંઘ સુપ્રીમો મોહન ભાગવતનું બયાન સામે આવ્યું છે, તેમણે આક્રોશપૂર્વક કહ્યું કે કાશ્મીરમાં લોકોને ધર્મ પૂછીને પછી મારી નાખવામાં આવ્યા છે. હિંદુઓ આવું કામ ક્યારેય નહી કરે, પરંતુ હવે આવા રાક્ષસોને મારવા માટે અષ્ટસિદ્ધિઓની જરૂર છે. જમ્મુ અને કાશ્મીરમાં થયેલા આતંકવાદી હુમલામાં 26 લોકોના મોત બાદ યોજાયેલા એક કાર્યક્રમમાં ભાગવતે કહ્યું, "અમે યોગ્ય જવાબની અપેક્ષા રાખીએ છીએ."

આરએસએસના વડાએ કહ્યું, "લોકોને તેમના ધર્મ વિશે પૂછવામાં આવ્યું અને તેમની હત્યા કરવામાં આવી. હિન્દુઓ ક્યારેય આવું કામ નહીં કરે." તેમણે કહ્યું, "યુદ્ધ ધર્મ અને અધર્મ વચ્ચે છે. આપણા હૃદયમાં પીડા છે. આપણે ક્રોધિત છીએ પણ દુષ્ટતાનો નાશ કરવા માટે, આપણે શક્તિ બતાવવી પડશે. જ્યારે રાવણે પોતાનો ઈરાદો ન બદલ્યો, ત્યારે બીજો કોઈ વિકલ્પ નહોતો. રામે તેને સુધારવાની તક આપી અને પછી તેને મારી નાખ્યો. આવી દુર્ઘટનાઓ અને દુષ્ટ કાવતરાઓને રોકવા માટે સમાજમાં એકતા જરૂરી છે. તેમણે કહ્યું, "જો આપણે એક થઈશું, તો કોઈ આપણી તરફ ખરાબ ઈરાદાથી જોવાની હિંમત કરશે નહીં અને જો કોઈ આવું કરશે, તો તેની આંખો કાઢી નાખવામાં આવશે. અમને સખત બદલાની અપેક્ષા છે.

આરએસએસના વડાએ એમ પણ ઉમેર્યું હતું કે , "દ્વેષ અને દુશ્મનાવટ આપણા સ્વભાવમાં નથી પણ ચૂપચાપ નુકસાન સહન કરવું પણ આપણા સ્વભાવમાં નથી. ખરેખર અહિંસક વ્યક્તિ શક્તિશાળી પણ હોવો જોઈએ. જો શક્તિ ન હોય તો કોઈ વિકલ્પ નથી. પરંતુ જ્યારે શક્તિ હોય ત્યારે જરૂર પડે ત્યારે તે દેખાવી જોઈએ.

ભાજપના રાષ્ટ્રીય મહાસચિવ તરુણ ચુગે પહેલગામ આતંકવાદી હુમલા પર કહ્યું, "આ ભારત અને માનવતા પર હુમલો છે. આમાં નિઃશસ્ત્ર અને નિર્દોષ પ્રવાસીઓને નિશાન બનાવવામાં આવ્યા છે. દેશ આને ક્યારેય માફ કરશે નહીં. વિશ્વને વડાપ્રધાન મોદીનો સંદેશ ખૂબ જ સ્પષ્ટ છે કે આ એક નવું ભારત છે. આતંકવાદ ક્યારેય ભારતની ભાવનાને તોડી શકશે નહીં. વડાપ્રધાન મોદીનો સંદેશ દેશની લાગણીઓને પ્રતિબિંબિત કરે છે.