કેન્દ્ર સરકારે સુપ્રીમ કોર્ટને જણાવ્યું હતું કે તે કંપનીઓને ડોકટરોને વિદેશ યાત્રા જેવા મોંઘા ટૂર પેકેજ અને લાભો આપીને તેમની દવાઓ વેચવાથી રોકવા માટે નિયમો ઘડવાનો વિચાર કરી રહી છે. આમાં બે મહિનાનો સમય લાગી શકે છે. સરકારના નિવેદનને રેકોર્ડ પર લેતા, સુપ્રીમ કોર્ટે કેસની આગામી સુનાવણી 28 જુલાઈ સુધી મુલતવી રાખી છે.

કોર્ટમાં ચર્ચા થઈ રહેલો કેસ 2021માં ફેડરેશન ઓફ મેડિકલ એન્ડ સેલ્સ રિપ્રેઝન્ટેટિવ્સ એસોસિએશન ઓફ ઈન્ડિયા દ્વારા દાખલ કરવામાં આવ્યો હતો. અરજીમાં દવાઓના માર્કેટિંગને નિયંત્રિત કરતા નિયમોને કાયદેસર રીતે બંધનકર્તા બનાવવાની માંગ કરવામાં આવી હતી. એક મે, 2025ના રોજ કેસની સુનાવણી કરતી વખતે, સુપ્રીમ કોર્ટે એક મહત્વપૂર્ણ અવલોકન કર્યું હતું. કોર્ટે જણાવ્યું હતું કે ડોક્ટરોએ ફક્ત જેનેરિક દવાઓ જ લખી આપવી જોઈએ.

આ અરજી કોવિડ દરમિયાન ડોકટરો દ્વારા સૌથી વધુ સૂચવવામાં આવતી દવાઓમાંની એક ડોલો 650 વિશે ઉઠાવવામાં આવેલા ગંભીર પ્રશ્નોના આધારે દાખલ કરવામાં આવી હતી. મેડિકલ રિપ્રેઝન્ટેટિવ્સ એસોસિએશને દાવો કર્યો હતો કે ડોલો 650માં પેરાસીટામોલની માત્રા દર્દીની જરૂરિયાત કરતા વધારે હતી. આ દવાને વધુ મોંઘી બનાવવા માટે કરવામાં આવ્યું હતું. ત્યારબાદ કંપનીએ ડોકટરોને તે લખવા માટે વિવિધ પ્રલોભનો આપ્યા હતા.

અરજીમાં આરોપ મૂકવામાં આવ્યો હતો કે ફાર્માસ્યુટિકલ કંપનીએ ડોક્ટરો માટે ભેટો અને વિદેશ યાત્રા પર રૂ.1,000 કરોડ ખર્ચ્યા હતા. મુખ્ય અરજી ઉપરાંત, આ મામલે અન્ય ઘણી જાહેર હિતની અરજીઓ પણ દાખલ કરવામાં આવી છે. કોર્ટ તે બધાની એકસાથે સુનાવણી કરી રહી છે. અરજીમાં જણાવાયું હતું કે સરકારે ફાર્માસ્યુટિકલ માર્કેટિંગ પ્રેક્ટિસનો એક સમાન કોડ ઘડ્યો છે, પરંતુ તે કાયદેસર રીતે બંધનકર્તા નથી. આ કોડના ફકરા છ અને સાત ફાર્માસ્યુટિકલ કંપનીઓને ડોક્ટરો અને અન્ય લોકોને ભેટોનું વિતરણ કરવા અથવા અન્ય લાભો આપવાથી પ્રતિબંધિત કરે છે, પરંતુ આ કોડ કાયદામાં ઘડવામાં આવ્યો નથી.

ગયા વર્ષે એક સુનાવણી દરમિયાન, કેન્દ્ર સરકારે કોર્ટને જાણ કરી હતી કે ભારતીય તબીબી પરિષદે ડોક્ટરોને જેનેરિક દવાઓ લખવાનો નિર્દેશ આપ્યો છે. આરોગ્ય અંગેની સંસદીય સમિતિએ આ મુદ્દા પર એક અહેવાલ પણ રજૂ કર્યો છે, જેના પર વિચારણા ચાલી રહી છે. દરમિયાન, કેન્દ્ર સરકારનું પ્રતિનિધિત્વ કરતા સોલિસિટર જનરલ તુષાર મહેતાએ મંગળવારના રોજ સુનાવણી દરમિયાન કોર્ટ પાસેથી બે મહિનાનો સમય માંગ્યો હતો. કોર્ટે આ વિનંતી સ્વીકારી અને અરજદારોને સરકારને તેમના સૂચનો રજૂ કરવા કહ્યું છે.