પારડી પાસે રાત્રીના હીટ એન્ડ રનની ઘટના બની હતી.જેમાં રોડ ક્રોસ કરી રહેલા રાહદારી પ્રૌઢને અજાણ્યા વાહને ઠોકરે લેતા ગંભીર રીતે ઘવાયેલા પ્રૌઢનું ટૂંકી સારવાર બાદ મોત થયું હતું.બનાવ અંગે પોલીસે ગનો નોંધવા અને પ્રૌઢને હડફેટે લેનાર વાહનચાલકને ઝડપી લેવા માટે શોધખોળ શરૂ કરી છે.બનાવની જાણવા મળતી વિગતો મુજબ,પારડી પાસે ચાલીને જઇ રહેલા રહિમભાઇ અબ્દુલભાઇ પઠાણ(ઉ.વ ૫૫) નામના પ્રૌઢ રોડ ક્રોસ કરી રહ્યા હતાં ત્યારે પૂરપાટ ઝડપે ધસી આવેલા બાઇક ચાલકે તેમને ઠોકરે લઇ બાઇક હંકારી મૂકયું હતું.અકસ્માતમાં ગંભીર રીતે ઘવાયેલા પ્રૌઠને સારવાર માટે હોસ્પિટલ ખસેડવામાં આવતા અહીં સારવાર કારગત નીવડે તે પૂર્વે જ પ્રૌઢનું મોત થયું હતું.બનાવને પગલે શાપર વેરાવળ પોલીસ મથકમાં સ્ટાફે જરી કાર્યવાહી કરી હતી.


અકસ્માતના આ બનાવની વધુમાં જાણવા મળતી વિગત મુજબ અકસ્માતમાં મોતને ભેટનાર રહિમભાઇ પઠાણ કોઠારીયા સોલવન્ટમાં બગદાદી બાગમાં રહેતા હતાં.તેઓ ગોંડલ પાસે આવેલી શકિતમાન ઇન્ડસ્ટ્રીઝમાં નોકરી કરતા હતાં.તેઓ ચાર ભાઇ બે બહેનના પરિવારમાં મોટા હતા તેમને સંતાનમાં એક પુત્ર અને બે પુત્રી છે.પ્રૌઢની મોટી દીકરીના લગ્ન પારડીમાં રહેતા અસલમભાઇ સાથે થયા છે.તેમની નાની દીકરી મોટી બહેનના ઘરે ગઇ હોય રહિમભાઇ રાત્રીના દીકરીને લેવા માટે જમાઇના ઘરે જતા હતા દરમિયાન આ ઘટના બની હતી. બનાવના પગલે મુસ્લિમ પરિવારમાં માતમ છવાય ગયો હતો.આ અંગે પોલીસે અજાણ્યા વાહનચાલક સામે ગુનો નોંધી તેને ઝડપી લેવા તપાસ હાથ ધરી છે.