ગ્લોબલ સ્ટાર પ્રિયંકા ચોપરા અને ઓસ્કાર વિજેતા રસેલ ક્રો ટૂંક સમયમાં જ સાયન્સ-ફિક્શન એક્શન થ્રિલર ફિલ્મ 'બ્લૂફ્લાય'માં એકસાથે જોવા મળશે. આ હાઇ-વોલ્ટેજ એક્શન થ્રિલર ફિલ્મનું શૂટિંગ આ જ વર્ષના અંતમાં ઓસ્ટ્રેલિયામાં શરૂ થશે. શૂટિંગ શરૂ થાય તે પહેલાં જ ટોરન્ટો ઇન્ટરનેશનલ ફિલ્મ ફેસ્ટિવલ દરમિયાન ફિલ્મના પ્રી-સેલ્સ રાઇટ્સ વેચવાની પ્રક્રિયા શરૂ કરવામાં આવશે. બંને કલાકારોને એક જ ફ્રેમમાં જોવા માટે ફેન્સ ખૂબ જ ઉત્સાહિત છે. ગ્લોબલ સ્ટાર પ્રિયંકા ચોપરા છેલ્લા ઘણા વર્ષોથી હોલીવુડમાં પોતાની પ્રતિભાનો જાદુ ચલાવી રહી છે. હવે તેના હાથે વધુ એક મોટી હોલીવુડ ફિલ્મ લાગી છે. પ્રિયંકા હવે ઓસ્કાર વિજેતા રસેલ ક્રો સાથે ટૂંક સમયમાં મોટા પડદા પર ધમાલ મચાવતી જોવા મળશે. બંને સાયન્સ-ફિક્શન થ્રિલર ફિલ્મ ‘બ્લૂફ્લાય’માં મુખ્ય ભૂમિકા ભજવશે. 'પ્રેડેટર્સ' જેવી શાનદાર ફિલ્મ બનાવી ચૂકેલા નિર્દેશક નિમરોદ એન્ટલ આ ફિલ્મનું નિર્દેશન કરી રહ્યા છે, જ્યારે તેની વાર્તા ડેવિડ ફ્રિજેરિયો, વિલિયમ યુબેંક અને કાર્લિલ યુબેંકે સાથે મળીને લખી છે. આ એક્શન થ્રિલર ફિલ્મ 'બ્લૂફ્લાય' કાંગોના ખતરનાક અને ઘાટા જંગલો વચ્ચે આલેખવામાં આવી છે. આ વાર્તા એક દુઃખી અને ગમગીન યુએન   ટ્રાન્સલેટરની આસપાસ ફરે છે, જેને એક સિક્રેટ મિશન પર મોકલવામાં આવે છે. આ મિશનનો હેતુ એક એવા રહસ્યમય ક્રેશ થયેલા વિમાનને શોધવાનો છે, જેનું કાગળો પર કોઈ અસ્તિત્વ જ નથી. જ્યારે સ્પેશિયલ ઓપરેશન્સની ટીમ બળવાખોરોના કબ્જા વાળા વિસ્તારમાંથી નદીના રસ્તે આગળ વધે છે, ત્યારે આ મિશન અત્યંત ભયાનક વળાંક લે છે. જેવા તેઓ તે વિમાનની નજીક પહોંચે છે, તેમને અહેસાસ થાય છે કે આ રહસ્યને શોધવું એ તેમના જીવનની સૌથી મોટી ભૂલ હતી. અહેવાલ મુજબ, આ ફિલ્મનું નિર્માણ પોલાઇટ સોસાયટીના માઇકલ જેફરસન, બ્રોકન ઓપન પિક્ચર્સના ડેવિડ ફ્રિજેરિયો અને હાઇલેન્ડ ફિલ્મ ગ્રુપ સાથે મળીને અગ્રણી નિર્માતાઓ કરી રહ્યા છે. હાઇલેન્ડ ફિલ્મ ગ્રુપ પાસે જ ફિલ્મના વર્લ્ડવાઇડ રાઇટ્સ છે, જેને તેઓ આગામી ટોરન્ટો ઇન્ટરનેશનલ ફિલ્મ ફેસ્ટિવલમાં વેચાણ માટે મૂકશે. આ ફિલ્મનું શૂટિંગ આ જ વર્ષના અંતમાં ઓસ્ટ્રેલિયાના ગોલ્ડ કોસ્ટ પર શરૂ થવાની શક્યતા છે. ફિલ્મ ‘ગ્લેડિયેટર’ માટે ઓસ્કાર જીતી ચૂકેલા રસેલ ક્રો હાલમાં જ ફિલ્મ ‘ન્યુરેમબર્ગ’માં જોવા મળ્યા હતા. તેમની પાસે હાલમાં ઘણા પ્રોજેક્ટ્સની લાઇન લાગેલી છે, જેમાં નેટફ્લિક્સની થ્રિલર ફિલ્મ ‘અનબોમ્બર’, ‘ધ વેટ’, ‘બિલિયન ડોલર સ્પાઇ’ અને એમેઝોન એમજીએમની ‘હાઇલાઇન્ડર’ રીબૂટ સામેલ છે.
જણાવી દઈએ કે ગ્લોબલ સ્ટાર પ્રિયંકા ચોપરા હાલમાં જ પ્રાઇમ વિડીયોની ફિલ્મ ‘ધ બ્લફ’માં જોવા મળી હતી. આ સિવાય તેણે ઇદ્રિસ એલ્બા અને જોન સીના સાથે ‘હેડ્સ ઓફ સ્ટેટ’માં કામ કર્યું છે. પ્રિયંકા ચોપરા આજકાલ એસ. એસ. રાજામૌલીની આગામી એક્શન-એડવેન્ચર ફિલ્મ ‘વારાણસી’ને લઈને ચર્ચામાં છે, જેમાં તે લીડ રોલમાં હશે. મહેશ બાબુ આ ફિલ્મના હીરો છે, જ્યારે પૃથ્વીરાજ સુકુમારન વિલનની ભૂમિકા ભજવી રહ્યા છે. એસ. એસ. રાજામૌલીની આ ફિલ્મ આવતા વર્ષે એપ્રિલ મહિનામાં સિનેમાઘરોમાં રિલીઝ થશે.