યુદ્ધના શરૂઆતના દિવસો પછી પહેલી વાર રશિયાના રાષ્ટ્રપતિ વ્લાદિમીર પુતિને યુક્રેન સાથે શાંતિ વાટાઘાટોનો પ્રસ્તાવ મૂક્યો છે. અગાઉ, પુતિને ઇસ્ટરના અવસર પર એક દિવસના એકપક્ષીય યુદ્ધવિરામની જાહેરાત કરી હતી. હવે તેણે બીજી વખત યુદ્ધ બંધ કરવાની ઓફર કરી છે. યુક્રેનના રાષ્ટ્રપતિ ઝેલેન્સકીએ પણ આ ઓફરનો સકારાત્મક પ્રતિભાવ આપ્યો છે. ઝેલેન્સકીએ રાત્રે રેકોર્ડ કરાયેલા એક વિડીયો સંદેશમાં ભાર મૂક્યો હતો કે યુક્રેન યુદ્ધવિરામ અંગે "કોઈપણ વાટાઘાટો માટે તૈયાર છે" જે નાગરિકો પરના હુમલા રોકવા તરફ એક સકારાત્મક પગલું હશે.પુતિન અને ઝેલેન્સકી બંને પર વાટાઘાટોના ટેબલ પર આવવા માટે અમેરિકાનું દબાણ છે. રાષ્ટ્રપતિ ડોનાલ્ડ ટ્રમ્પે કહ્યું છે કે જો બંને દેશો શાંતિના પગલાં પર આગળ નહીં વધે તો અમેરિકા આ ​​પ્રયાસમાંથી ખસી જશે.

ગયા સપ્તાહના અંતે મોસ્કો દ્વારા જાહેર કરાયેલા 30 કલાકના ઇસ્ટર યુદ્ધવિરામ બાદ રશિયા અને યુક્રેને કહ્યું છે કે તેઓ વધુ યુદ્ધવિરામ માટે તૈયાર છે. જોકે, બંને પક્ષોએ એકબીજા પર તેનું ઉલ્લંઘન કરવાનો આરોપ લગાવ્યો છે.

ઝેલેન્સકીએ કહ્યું કે યુક્રેન બુધવારે લંડનમાં અમેરિકા અને યુરોપિયન દેશો સાથેની વાટાઘાટોમાં ભાગ લેશે. આ ચર્ચા ગયા અઠવાડિયે પેરિસમાં યોજાયેલી બેઠકને અનુસરે છે, જેમાં યુએસ અને યુરોપિયન દેશોએ ત્રણ વર્ષથી વધુ જૂના યુદ્ધને સમાપ્ત કરવાના માર્ગો પર ચર્ચા કરી હતી.

પુતીને શું કહ્યું?

પુતિને કહ્યું કે ઇસ્ટર યુદ્ધવિરામ પછી લડાઈ ફરી શરૂ થઈ ગઈ છે, જેની તેમણે શનિવારે એકપક્ષીય જાહેરાત કરી હતી. તેમણે કહ્યું કે મોસ્કો કોઈપણ શાંતિ પહેલ માટે ખુલ્લું છે અને કિવ પાસેથી પણ એવી જ અપેક્ષા રાખે છે.અમે હંમેશા એ હકીકત વિશે વાત કરી છે કે કોઈપણ શાંતિ પહેલ પ્રત્યે અમારું વલણ સકારાત્મક છે. અમને આશા છે કે કિવ શાસનના પ્રતિનિધિઓ પણ આવું જ અનુભવશે

ક્રેમલિનના પ્રવક્તા દિમિત્રી પેસ્કોવે પત્રકારોને જણાવ્યું: "જ્યારે રાષ્ટ્રપતિએ કહ્યું કે નાગરિક લક્ષ્યો પર હુમલો ન કરવાના મુદ્દા પર ચર્ચા શક્ય છે, ત્યારે રાષ્ટ્રપતિના મનમાં યુક્રેનિયન પક્ષ સાથે વાટાઘાટો અને ચર્ચાઓ હતી.

ઝેલેન્સકીએ શું કહ્યું?

ઝેલેન્સકીએ કહ્યું કે યુક્રેન નાગરિક લક્ષ્યો પર હુમલા રોકવાના તેના પ્રસ્તાવ પર અડગ છે અને આ હાંસલ કરવા માટે કોઈપણ પ્રકારની ચર્ચા માટે તૈયાર છે. યુક્રેન ઓછામાં ઓછું નાગરિક લક્ષ્યો પર હુમલો ન કરવાના તેના પ્રસ્તાવ પર અડગ છે. અને અમે મોસ્કો તરફથી સ્પષ્ટ પ્રતિભાવની અપેક્ષા રાખીએ છીએ, અમે આ કેવી રીતે પ્રાપ્ત કરવું તે અંગે કોઈપણ વાટાઘાટો માટે તૈયાર છીએ.યુક્રેનની કાર્યવાહી ટાઈટ ફોર ટેટ ધોરણે થશે. યુદ્ધવિરામનો જવાબ યુદ્ધવિરામથી આપવામાં આવશે, અને રશિયન હુમલાઓનો જવાબ આપણા બચાવથી આપવામાં આવશે.

પુતિનનો યુદ્ધવિરામ પ્રસ્તાવ મોટાભાગે શરતી

લાંબા સમયથી ચાલતું યુદ્ધ રશિયા પર દબાણ લાવી રહ્યું છે. દેશ આર્થિક દબાણનો સામનો કરી રહ્યો છે. રશિયન સૈનિકો અનુશાસનહીન બની ગયા છે અને ભાગી રહ્યા છે. યુવાનોમાં નવા સૈનિકોની ભરતી કરવામાં અનિચ્છા અને વધતી જતી જાનહાનિને કારણે ઘરેલું અસંતોષ વધી રહ્યો છે.યુદ્ધમાં થયેલા નુકસાન, પશ્ચિમી પ્રતિબંધો અને 300 બિલિયન ડોલર રશિયન સંપત્તિ જપ્ત કરવાથી પુતિન માટે આંતરિક અને બાહ્ય પડકારો ઉભા થયા છે. પુતિનની વાતચીત પ્રત્યેની ખુલ્લી ભાવના દર્શાવે છે કે તેઓ યુદ્ધની સમસ્યાથી છૂટકારો મેળવવા માંગે છે.

પુતિનનો યુદ્ધવિરામ પ્રસ્તાવ આંશિક રીતે ગંભીર લાગે છે, પરંતુ મોટાભાગે શરતી છે. આર્થિક અને લશ્કરી તણાવને કારણે વધતો સંઘર્ષ કદાચ અસ્વસ્થતાનું કારણ બની રહ્યો છે, પરંતુ પુતિનના કાર્યો દર્શાવે છે કે તેઓ વ્યૂહાત્મક લાભ મેળવવા પર ધ્યાન કેન્દ્રિત કરી રહ્યા છે.પુતિનની યુદ્ધવિરામ અને વાટાઘાટોની તૈયારી રાજદ્વારી દબાણ અને રશિયાની આંતરિક પરિસ્થિતિ (આર્થિક, લશ્કરી અને સામાજિક) નું પરિણામ હોઈ શકે છે. પરંતુ શું આ સંપૂર્ણ પીછેહઠની ઇચ્છા છે કે રશિયાના હિતોનું રક્ષણ કરતી વખતે યુદ્ધને નિયંત્રિત કરવાની વ્યૂહરચના છે, તે બાબત પર નિષ્ણાતો નજર રાખી રહ્યા છે.