રાજકોટ માર્કેટ યાર્ડમાં આવતીકાલે રામનવમી અને રવિવારની રજા પૂર્વે આજે ઘઉંમાં ચાલુ સીઝનની સર્વાધિક આવક ૨.૫૦ લાખ મણ (૫૦ લાખ કિલો)ની આવક નોંધાઇ છે. રાજકોટ, લોધિકા અને પડધરી તાલુકાના ૧૮૦ ગામોમાંથી ઘઉં લઇને આવેલા ખેડૂતોના ૧૬૦૦ વાહનોને એન્ટ્રી અપાઇ હતી, જ્યારે ૩૦૦ વાહનો હજુ વેઇટિંગમાં હોવાનું જાણવા મળે છે.

વિશેષમાં રાજકોટ માર્કેટ યાર્ડના વેપારી વર્તુળોએ જણાવ્યું હતું કે, ઘઉંની ઉપરથી ડિમાન્ડ હોવાને કારણે આવક વધવા છતાં ભાવ જળવાય રહ્યા છે. ઘઉં લોકવનમાં પ્રતિ ૨૦ કિલોનો ભાવ ગુણવત્તા અનુસાર રૂ.૪૭૦થી ૫૩૫ અને ઘઉં ટુકડામાં પ્રતિ ૨૦ કિલોનો ભાવ ગુણવત્તા અનુસાર રૂ.૪૭૩થી ૬૧૫ સુધી રહ્યો છે. રાજકોટ માર્કેટ યાર્ડમાં ઘઉંના ભાવ સારા ઉપજતા હોય રાજકોટ જિલ્લા ઉપરાંત સૌરાષ્ટ્રના અન્ય જિલ્લાના ખેડૂતો પણ રાજકોટ માર્કેટ યાર્ડમાં ઘઉં વેંચવા માટે આવવા લાગ્યા છે.

દરમિયાન રાજકોટ માર્કેટ યાર્ડના સેક્રેટરી બી.આર. તેજાણીએ જણાવ્યું હતું કે યાર્ડના પ્લેટફોર્મ્સ અને ગ્રાઉન્ડ ઘઉંથી છલકાઇ ઉઠ્યા હોય અને ઘઉં રાખવાની જગ્યા રહી ન હોય હવે ઉપલબ્ધ જથ્થાનો નિકાલ ન થાય અને નવી જાહેરાત ન કરાય ત્યાં સુધી ઘઉંની આવક બંધ કરવામાં આવી છે.