રાજ્યના માત્ર આઠ શહેરમાં 40 ડિગ્રીથી વધુ તાપમાન

આજકાલ પ્રતિનિધિ રાજકોટ

હીટ વેવનો ત્રણ દિવસનો ટૂંકો રાઉન્ડ ગઈકાલે પૂરો થઈ ગયો છે. રાજકોટમાં તો ગઈકાલે જ હીટ વેવનું યલો એલર્ટ પાછું ખેંચી લેવામાં આવ્યું હતું. ત્યારે આજે રાજ્યમાં ક્યાંય હીટ વેવ માટે એલર્ટ આપવામાં આવ્યું નથી.

હવામાન ખાતાના જણાવ્યા મુજબ આજથી ગરમીના પ્રમાણમાં ત્રણ દિવસ સુધી ત્રણથી ચાર ડિગ્રી જેટલો ઘટાડો થશે અને ત્યાર પછી એટલે કે સોમવારથી ફરી મહત્તમ તાપમાન વધશે અને ચાર દિવસમાં ચાર ડિગ્રી જેટલું તાપમાન ઊંચકાશે.

મંગળવારે રાજ્યના માત્ર આઠ શહેરોમાં જ મહત્તમ તાપમાનનો પારો 40 થી 44.6 ડિગ્રી હતો. સમગ્ર રાજ્યમાં સૌથી ઊંચું તાપમાન ગઈકાલે કંડલા એરપોર્ટ ઉપર 44.6 ડિગ્રી નોંધાયું હતું. હવામાન ખાતાએ પણ ગઈકાલે કચ્છ માટે હિટ વેવનું યલો એલર્ટ જાહેર કર્યું હતું. ભુજમાં ગઈકાલે 41.4 ડિગ્રી મહત્તમ તાપમાન રહ્યું હતું.

ગુરુવારે રાજ્યના અન્ય જે શહેરોમાં મહત્તમ તાપમાન 40 ડિગ્રીથી વધુ હતું તેમાં અમદાવાદમાં 41.8 ગાંધીનગરમાં 41 ડીસામાં 40.2 અમરેલીમાં 42.5 રાજકોટમાં 42.9 અને સુરેન્દ્રનગરમાં 43.3 ડીગ્રી મહત્તમ તાપમાન નોંધાયું હતું.

વાતાવરણમાં ભેજનું પ્રમાણ વધી ગયું છે. પોરબંદરમાં 95 વેરાવળમાં 95 કંડલામાં 87 દ્વારકામાં 86 સુરતમાં 85 રાજકોટમાં 76% ભેજ આજે સવારે નોંધાયો છે.ગુજરાત સહિત દેશના મોટાભાગના રાજ્યોમાં ગરમીનું પ્રમાણ ઘટી ગયું છે. રાજસ્થાનને બાદ કરતાં સમગ્ર દેશમાં ક્યાંય હિટ વેવ માટે કોઈ પ્રકારનું એલર્ટ હવામાન વિભાગ દ્વારા જાહેર કરવામાં આવ્યું નથી. ઊલટાનું જમ્મુ કાશ્મીર લદાખ આસામ અરુણાચલ પ્રદેશ મેઘાલય સિક્કિમ મિઝોરમ તામિલનાડુ કેરલા બિહાર ઉત્તર પ્રદેશ સહિત દેશના મોટાભાગના રાજ્યોમાં તોફાની પવન અને મેઘ ગર્જના સાથે વરસાદની આગાહી કરવામાં આવી છે.દેશના જુદા જુદા ભાગમાં વેસ્ટર્ન ડિસ્ટર્બન્સ, સાયકલોનિક સર્ક્યુલેશન અને ટ્રફ જેવી સિસ્ટમના કારણે વરસાદ પડી રહ્યો છે.