BREAKING NEWS

ગુજરાતી સાહિત્ય જગતને મોટી ખોટ: જાણીતા કવિ-ગઝલકાર રાજેન્દ્ર શુક્લનું નિધન, 84 વર્ષની વયે લીધા અંતિમ શ્વાસ

  • November 22, 2026 12:44 PM 
Aajkaal Daily (Desh Pardesh Ni Aajkaal)

ગુજરાતી સાહિત્યના અત્યંત પ્રતિષ્ઠિત કવિ, ગઝલકાર અને સર્જક રાજેન્દ્ર શુક્લનું 84 વર્ષની વયે આજે વહેલી સવારે દુઃખદ નિધન થયું છે. તેમણે અમદાવાદ ખાતે જ અંતિમ શ્વાસ લીધા હતા. મળતી માહિતી મુજબ, છેલ્લા બે-ત્રણ દિવસથી હૃદયને લગતી બીમારીની સારવાર માટે તેમને હોસ્પિટલમાં દાખલ કરવામાં આવ્યા હતા, જ્યાં સારવાર દરમિયાન જ તેમનું અવસાન થયું હતું. તેમના નિધનના સમાચાર મળતા જ સાહિત્ય જગત, કલાકારો અને ચાહકોમાં ઘેરા શોકની લાગણી ફેલાઈ ગઈ છે. તેમની સ્મશાન યાત્રા આજે સાંજે 6 વાગ્યે તેમના નિવાસસ્થાનેથી થલતેજ સ્મશાન સુધી લઈ જવામાં આવશે.


બાંટવામાં જન્મ અને સાહિત્યિક વિરાસત

રાજેન્દ્ર શુક્લએ ભલે દેહ છોડ્યો હોય, પરંતુ તેઓ શબ્દો અને ઉત્તમ કાવ્યસર્જનની ઐતિહાસિક વિરાસત ગુજરાતી ભાષાને મૂકતા ગયા છે. રાજેન્દ્ર અનંતરાય શુક્લનો જન્મ 12 ઓક્ટોબર 1942ના રોજ જૂનાગઢ જિલ્લાના બાંટવા ગામે થયો હતો. આધુનિક ગુજરાતી સાહિત્યમાં તેઓ એક ઊંચું સ્થાન ધરાવતા હતા અને કવિતા, ગઝલ તેમજ વિવેચન ક્ષેત્રે તેમણે પોતાની આગવી ઓળખ ઊભી કરી હતી.


ગિરનારનો પ્રભાવ, અધ્યાપન અને હોમ-સ્કૂલિંગનો પ્રયોગ

રાજેન્દ્ર શુક્લના વ્યક્તિત્વ અને કાવ્યસર્જન પર ગિરનારની તળેટી તેમજ આદ્યકવિ નરસિંહ મહેતાની રચનાઓનો ઊંડો પ્રભાવ જોવા મળે છે. તેમણે અમદાવાદની એલ. ડી. આર્ટ્સ કોલેજ અને ગુજરાત યુનિવર્સિટીમાંથી સંસ્કૃત અને પ્રાકૃત વિષયો સાથે અનુસ્નાતક (એમ.એ.)ની પદવી મેળવી હતી. 1982 સુધી વિવિધ કૉલેજોમાં અધ્યાપન કાર્ય કર્યા બાદ તેમણે સ્વૈચ્છિક નિવૃત્તિ લીધી હતી અને ત્યારબાદ પૂર્ણપણે કાવ્યસર્જન તથા પોતાના સંતાનોને ઘરે જ શિક્ષણ આપવાના નવતર હોમ-સ્કૂલિંગ પ્રયોગમાં સમય ફાળવ્યો હતો. તેમના જીવનસાથી નયના જાની પણ ગુજરાતી સાહિત્યમાં એક જાણીતા કવિયત્રી તરીકે સ્થાન ધરાવે છે.


સંસ્કૃત-તળપદીનો સમન્વય અને નોંધપાત્ર કૃતિઓ

ગુજરાતી ગઝલ ક્ષેત્રે સંસ્કૃત અને તળપદી ભાષાના અનોખા સમન્વય તેમજ આધ્યાત્મિક ઊંડાણ માટે રાજેન્દ્ર શુક્લ ખાસ જાણીતા હતા. ગઝલ ઉપરાંત તેમણે ગીત, છંદોબદ્ધ કાવ્યો અને અછાંદસ રચનાઓમાં પણ નોંધપાત્ર પ્રદાન કર્યું છે, જેમાં ભારતીય તત્વજ્ઞાન, સંગીત અને સૂક્ષ્મ સંવેદનાઓની સુંદર ઝલક મળે છે. તેમના મુખ્ય કાવ્યસંગ્રહોમાં પ્રથમ પુરસ્કૃત સંગ્રહ ‘કોમલ રિષભ’ (1970), દીર્ઘકાવ્ય ‘સ્વવાચકની શોધ’ (1972) અને અત્યંત લોકપ્રિય સંગ્રહ ‘અંતર ગાંધાર’ (1981) નો સમાવેશ થાય છે. આ ઉપરાંત, તેમની 30 વર્ષની ગઝલયાત્રાને આવરી લેતો પાંચ ભાગનો બૃહદ ગ્રંથ ‘ગઝલસંહિતા’ (2005) ગુજરાતી સાહિત્યની એક અમૂલ્ય મૂડી સમાન છે.


અનેક પ્રતિષ્ઠિત સન્માનો અને પુરસ્કારોથી સન્માનિત

ગુજરાતી સાહિત્યમાં તેમના અવિસ્મરણીય અને સમૃદ્ધ યોગદાન બદલ તેમને લગભગ તમામ પ્રતિષ્ઠિત સન્માનો પ્રાપ્ત થયા હતા. વર્ષ 2006માં તેમને રણજિતરામ સુવર્ણચંદ્રક અને નરસિંહ મહેતા એવોર્ડ એનાયત થયા હતા, જ્યારે 2007માં તેમના ગ્રંથ ‘ગઝલસંહિતા’ માટે તેમને રાષ્ટ્રીય સાહિત્ય અકાદમી પુરસ્કાર મળ્યો હતો. આ સિવાય પણ તેમને નર્મદ સુવર્ણચંદ્રક (2008), વલી ગુજરાતી ગઝલ એવોર્ડ (2009), કવિ શ્રી ન્હાનાલાલ પારિતોષિક અને ઉમા-સ્નેહરશ્મિ પારિતોષિક જેવા અનેક ગૌરવવંતા પુરસ્કારોથી નવાજવામાં આવ્યા હતા. તેમના જવાથી ગુજરાતી સાહિત્યએ એક સંવેદનશીલ અને મહાન સર્જક ગુમાવ્યા છે.



લાઈક અને ફોલો કરો અમારું ફેસબુક પેજ FACEBOOK - AAJKAALDAILY


ફોલો કરો અમારું ઇન્સ્ટાગ્રામ INSTAGRAM - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  99251 12230  

View News On Application