શહેરના ગુરુપ્રસાદ ચોક નજીક બાલાજી ફરસાણ નામની દુકાનમાંથી રીક્ષા લઈને આવેલા ચાલકે દુકાનદારની નજર ચૂકવી ગલ્લામાં રહેલા રૂ. 5000ની ચોરી કરી નાસી જતા દુકાનદારે અજાણ્યા શખસ સામે ફરિયાદ નોંધાવતા પોલીસે ગુનો નોંધી શોધખોળ હાથ ધરી હતી. ચોરીની સમગ્ર ઘટના સીસીટીવીમાં કેદ થઇ જતા પોલીસે ફૂટેજ મેળવી રીક્ષા ચાલકને ગણતરીની કલાકોમાં શોધી લઈ સકંજામાં લીધો છે.

આ અંગે ગોકુલધામ સોસાયટીમા રહેતા અને ગુરુપ્રસાદ ચોક નજીક બાલાજી ફરસાણ નામની દુકાન ધરાવતા વિશાલ નીતિનભાઈ ચંદારાણા નામના વેપારીએ ફરિયાદમાં જણાવ્યું હતું કે, ગઈકાલે દુકાને હતો ત્યારે એક રીક્ષા વાળો દુકાનના બહારના ભાગે ગ્રાહક તરીકે આવ્યો હતો અને હું દુકાનનો માલ સામાન ગોઠવતો હતો આથી મેં તેને ઉભુ રહેવાનુ કહ્યું હતું. કામ પતાવી જોતા રિક્ષા ચાલક ચાલ્યો ગયો હતો. અને થડાનું પૈસાનું ખાનુ ખુલ્લુ હતુ. જેમાં જોતા રૂ. ૫૦૦૦ રોકડા જોવામાં ના આવતા આ રિક્ષા ચાલક ચોરી કરી ગયાનું લાગતા તરત સીસીટીવી ચેક કરતા તેમાં ગ્રાહકના સ્વાંગમાં આવેલો રિક્ષા ચાલક પૈસાની ચોરી કરતો હોવાનું જોવા મળ્યું હતું. માલવીયા નગર પોલીસે સીસીટીવી ફૂટેજના આધારે શખ્સને સંકજામાં લઇ આગળની કાર્યવાહી હાથ ધરી છે.