એક દાયકાથી વધુ સમય સુધી ચાલેલા સંઘર્ષ પછી, થાઇલેન્ડમાં સમલૈંગિક લગ્નને માન્યતા આપતો કાયદો અમલમાં આવ્યો છે. ગુરુવારે રાજધાની બેંગકોકમાં સેંકડો યુગલોએ સમૂહ લગ્ન સમારોહમાં ભાગ લીધો હતો. લગ્ન પછી, આ યુગલોને પ્રમાણપત્રો પણ આપવામાં આવ્યા હતા. આ કાયદાના અમલીકરણ સાથે, આ યુગલોને નાણાકીય અને તબીબી અધિકારો પણ મળ્યા છે.

ગયા વર્ષે થાઇલેન્ડમાં સમલૈંગિક લગ્નને કાયદેસર ઠેરવ્યા બાદ, હવે તે સમગ્ર દેશમાં લાગુ કરવામાં આવ્યું છે. થાઇલેન્ડ આવું કરનાર દક્ષિણ-પૂર્વ એશિયાનો પ્રથમ દેશ બન્યો. ગુરુવારે થાઇલેન્ડમાં સમલૈંગિક સમૂહ લગ્નમાં મોટી સંખ્યામાં સમલૈંગિક યુગલોએ ભાગ લીધો હતો.

લગ્નને કાયદેસર માન્યતા મળ્યા બાદ સમલૈંગિક યુગલોમાં ખુશીની લહેર છે. તેઓ સરકારના આ પગલાને સ્વપ્ન સાકાર થવા જેવું ગણાવી રહ્યા છે. ગુરુવારે થાઇલેન્ડભરના લોકોએ આ ખુશીની ઉજવણી કરી. સમલૈંગિક લગ્ન કાયદાની માંગ કરી રહેલા કાર્યકરોએ તેને એક મોટી જીત ગણાવી.

કાયદામાં ઘણા અધિકારો આપવામાં આવ્યા

થાઇલેન્ડમાં LGBTQ+ સમુદાય એક દાયકા કરતાં વધુ સમયથી સમલૈંગિક લગ્નની માંગ કરી રહ્યો છે. થાઈ સંસદ દ્વારા પસાર કરાયેલા બિલને ગયા વર્ષે રાજા દ્વારા મંજૂરી આપવામાં આવી હતી. આ કાયદાને કારણે, સમલૈંગિક યુગલોને નાણાકીય, કાનૂની અને તબીબી અધિકારો મળ્યા છે. તે બાળકને દત્તક પણ લઈ શકશે.