મોરબી જિલ્લાના હળવદ પંથકમાં છેલ્લા કેટલાક સમયથી ગેરકાયદેસર રીતે રેતીનું ખનન કરતી ભૂમાફિયાઓની પ્રવૃત્તિઓ સામે ખાણ ખનિજ વિભાગે કડક વલણ અપનાવ્યું છે. સ્થાનિક સ્તરે મળતી ફરિયાદો અને ગેરકાયદેસર પ્રવૃત્તિઓ પર લગામ કસવા માટે તંત્ર દ્વારા ખાસ રણનીતિ તૈયાર કરવામાં આવી હતી. આ ઝુંબેશના ભાગરૂપે રાજકોટ ફ્લાઈંગ સ્કવોર્ડની ટીમે મોડી રાત્રે ગુપ્ત બાતમીના આધારે હળવદ તાલુકાના ચાડધરા ગામ નજીકથી પસાર થતી બ્રાહ્મણી નદીના પટમાં અચાનક ત્રાટક દરોડો પાડ્યો હતો.

આ સરપ્રાઇઝ ચેકિંગ દરમિયાન નદીના પટમાંથી ગેરકાયદેસર રીતે ખનિજ ચોરી કરીને રેતીનું ખનન કરી રહેલા માફિયાઓમાં ભારે નાસભાગ મચી ગઈ હતી. અધિકારીઓની ટીમે સ્થળ પર પહોંચીને સમગ્ર વિસ્તારને કોર્ડન કરી લીધો હતો. રાજકોટ ફ્લાઈંગ સ્કવોર્ડની ટીમે સ્થળ પરથી ગેરકાયદે ખનન અને વહન પ્રવૃત્તિમાં રોકાયેલા કુલ પાંચ હેવી વાહનોને ઝડપી પાડ્યા હતા. આ જપ્ત કરાયેલા વાહનોમાં 2 ડમ્પર, 2 હિટાચી અને 1 લોડર મશીનનો સમાવેશ થાય છે. ખાણ ખનિજ વિભાગે લાખો રૂપિયાની કિંમત ધરાવતી આ તમામ મશીનરીને ઘટનાસ્થળેથી જ જપ્ત કરી કાયદેસરની કાર્યવાહી હાથ ધરી હતી.

દરોડાની કામગીરી સફળતાપૂર્વક પૂર્ણ કર્યા બાદ, ફ્લાઈંગ સ્કવોર્ડની ટીમે જપ્ત કરાયેલા તમામ પાંચેય વાહનોને આગળની કાનૂની કાર્યવાહી અને સુરક્ષિત કસ્ટડી અર્થે હળવદ પોલીસ સ્ટેશનને હવાલે કર્યા છે. આ સાથે જ ખાણ ખનિજ વિભાગ દ્વારા સંબંધિત ભૂમાફિયાઓ સામે દંડકીય આકારણીની પ્રક્રિયા શરૂ કરવામાં આવી છે.

મોડી રાત્રે પાડવામાં આવેલા આ અચાનક દરોડાને પગલે હળવદ પંથકના ભૂમાફિયાઓ અને ગેરકાયદેસર રેતી ખનન કરતા અસામાજિક તત્વોમાં ભારે ફાળચ વ્યાપી ગઈ છે. સરકારી તંત્રની આ કડક કામગીરીથી આગામી દિવસોમાં કુદરતી સંપત્તિની ચોરી કરતી પ્રવૃત્તિઓ પર લગામ આવશે તેવી સ્થાનિકોમાં આશા જાગી છે.