શેરબજારમાં જોવા મળતી ભારે અસ્થિરતા અને ઉતાર-ચઢાવ વચ્ચે રોકાણકારો હંમેશા એવા વિકલ્પોની શોધમાં હોય છે જે બજારના સામાન્ય સૂચકાંકો કરતા વધુ વળતર આપી શકે. આવા સમયે ICICI પ્રુડેન્શિયલના એક ખાસ મ્યુચ્યુઅલ ફંડે કમાલ કરી બતાવી છે. આ સ્કીમે માત્ર સેન્સેક્સ અને નિફ્ટીને જ નહીં, પરંતુ તેના હરીફ ફંડોને પણ વળતરની બાબતમાં પાછળ છોડી દીધા છે.

1 લાખનું રોકાણ વધીને 2.51 લાખ થયું
ICICI પ્રુડેન્શિયલ બિઝનેસ સાયકલ ફંડે તાજેતરમાં જ તેના સફળ પાંચ વર્ષ પૂર્ણ કર્યા છે. આ સમયગાળા દરમિયાન રોકાણકારોની સંપત્તિમાં તોતિંગ વધારો જોવા મળ્યો છે. જો કોઈ રોકાણકારે પાંચ વર્ષ પહેલા આ સ્કીમમાં 1 લાખ રૂપિયાનું એકમું રોકાણ કર્યું હોત, તો આજે તે રકમ વધીને 2.51 લાખ રૂપિયા થઈ ગઈ છે. તેની સરખામણીમાં જો આ જ રકમ નિફ્ટી-500 TRI માં રોકવામાં આવી હોત, તો તે વધીને 2.06 લાખ રૂપિયા જ થઈ હોત. આમ, આ ફંડે બજારના સરેરાશ વળતર કરતા નોંધપાત્ર દેખાવ કર્યો છે.

SIP રોકાણકારો માટે પણ લોટરી જેવો ફાયદો
માત્ર એકમું રોકાણ જ નહીં, પરંતુ જે લોકોએ દર મહિને વ્યવસ્થિત રોકાણ (SIP) કર્યું છે તેમને પણ મોટો ફાયદો થયો છે. આ સ્કીમની શરૂઆતથી જ જો કોઈએ દર મહિને 10,000 રૂપિયાની SIP શરૂ કરી હોત, તો 31 જાન્યુઆરી, 2026 સુધીમાં તેમનું કુલ 6.10 લાખનું રોકાણ વધીને આશરે 9.74 લાખ રૂપિયા થઈ ગયું છે. આ ગણતરી મુજબ રોકાણકારોને વાર્ષિક 18.47% જેટલું ચક્રવૃદ્ધિ વળતર મળ્યું છે.

અન્ય ફંડોની સરખામણીમાં શ્રેષ્ઠ પ્રદર્શન
વેલ્યુ રિસર્ચના આંકડા મુજબ, છેલ્લા એક વર્ષમાં બિઝનેસ સાયકલ ફંડોએ 18% થી વધુ વળતર આપ્યું છે. ICICI પ્રુડેન્શિયલના આ ફંડે એક વર્ષમાં 18.12% અને ત્રણ વર્ષમાં 22.82% વળતર આપ્યું છે. તેની સરખામણીમાં કોટક બિઝનેસ સાયકલ ફંડે અનુક્રમે 10.48% અને 17.80% વળતર આપ્યું છે, જ્યારે એચડીએફસીની સમાન સ્કીમે 8.59% અને 14.97% વળતર આપ્યું છે.

કઈ રણનીતિને કારણે મળ્યું આટલું વળતર?
આ ફંડની સફળતા પાછળ તેની ખાસ રોકાણ પદ્ધતિ જવાબદાર છે. આ સ્કીમ 'ટોપ-ડાઉન' એપ્રોચ અપનાવે છે, જેમાં જીડીપી ગ્રોથ, મોંઘવારી દર, વ્યાજ દર અને વૈશ્વિક આર્થિક સ્થિતિ જેવા પરિબળોને ધ્યાનમાં રાખવામાં આવે છે.

વ્યૂહાત્મક પસંદગી: અર્થતંત્રના કયા ક્ષેત્રમાં તેજી આવવાની સંભાવના છે તે પારખીને તે મુજબ પોર્ટફોલિયો તૈયાર કરવામાં આવે છે.

મુખ્ય સેક્ટર્સ: હાલમાં આ ફંડનું 80% રોકાણ એવા ક્ષેત્રોમાં છે જે આર્થિક ગતિવિધિઓ સુધરવાથી સીધો લાભ મેળવી શકે છે. જેમાં બેંકિંગ અને ફાઈનાન્સિયલ સેક્ટર મુખ્ય છે, સાથે જ ઓટોમોબાઈલ, કન્સ્ટ્રક્શન અને ઈન્ડસ્ટ્રીયલ સેક્ટરમાં પણ મોટું રોકાણ કરવામાં આવ્યું છે.

ICICI પ્રુડેન્શિયલ AMC ના ચીફ ઇન્વેસ્ટમેન્ટ ઓફિસર એસ. નરેન જણાવે છે કે ભારતની અર્થવ્યવસ્થામાં બિઝનેસ સાયકલ મુજબ ફેરફારો થતા રહે છે. જે તે સમયે જે સેક્ટર મજબૂત હોય તેમાં રોકાણ કરવાથી લાંબા ગાળે સંપત્તિનું સર્જન કરવામાં મદદ મળે છે.