શેરબજારમાં ફરી એકવાર મોટો ઘટાડો જોવા મળ્યો છે. ગઈકાલે આવેલા ભારે ઘટાડા બાદ, આજે મંગળવાર પણ અમંગલ સાબિત થયો હોય તેમ સેન્સેક્સ અને નિફ્ટી કડાકા સાથે ખુલ્યા હતા. સેન્સેક્સ ૭૦૭ પોઈન્ટથી વધુ તૂટ્યો હતો, જ્યારે નિફ્ટી ઇન્ડેક્સ ૨૧૧ પોઈન્ટ ઘટીને 22,600ની સપાટીની આસપાસ કારોબાર કરી રહ્યો હતો. આ દરમિયાન, મોટાભાગની મુખ્ય કંપનીઓના શેરમાં પણ ઘટાડો જોવા મળ્યો હતો.

ભારતીય શેરબજારમાં તાજેતરના ઘટાડા પાછળ વૈશ્વિક તણાવ અને આર્થિક દબાણ મુખ્ય કારણો છે. અમેરિકા અને ઈરાન વચ્ચે વધતા જતા સંઘર્ષને કારણે ક્રૂડ ઓઈલના ભાવ પ્રતિ બેરલ 107 ડોલરની નજીક પહોંચી ગયા છે, જે ભારત જેવા મુખ્ય તેલ આયાતકાર રાષ્ટ્ર માટે ચિંતાનો વિષય છે. વધુમાં, યુએસ બોન્ડ યીલ્ડમાં તીવ્ર ઉછાળો અને વિદેશી સંસ્થાકીય રોકાણકારો (FII) દ્વારા સતત મૂડી બહાર જવાને કારણે સ્થાનિક બજાર તીવ્ર વેચાણ દબાણનો સામનો કરી રહ્યું છે.

એનરિચ મનીના સીઈઓ પોનમુડી આર, એ જણાવ્યું હતું કે ભારતીય ઇક્વિટી બજાર પર દબાણ ચાલુ રહેવાની શક્યતા છે. ક્રૂડ ઓઈલના ઊંચા ભાવ અને યુએસ-ઈરાન સંઘર્ષ અંગે ચાલુ અનિશ્ચિતતા બજારની ભાવના પર ભાર મૂકી રહી છે. યુએસ પ્રમુખ ડોનાલ્ડ ટ્રમ્પે ભારપૂર્વક જણાવ્યું છે કે યુએસ આ સંઘર્ષ ખૂબ જ ઝડપથી જીતી જશે; જોકે, સંભવિત વાટાઘાટો અંગે નોંધપાત્ર અનિશ્ચિતતા રહે છે. આનાથી હોર્મુઝ સ્ટ્રેટ દ્વારા સપ્લાયમાં સંભવિત વિક્ષેપો અંગે ચિંતા વધી ગઈ છે.

સેન્સેક્સ અને નિફ્ટીમાં આવેલા આ ઘટાડાના સંકેતો વિદેશી બજારો પરથી જ સ્પષ્ટ થઈ ગયા હતા. અગાઉના ટ્રેડિંગ સત્ર દરમિયાન યુએસ શેરબજારમાં ભારે વેચવાલી જોવા મળી હતી, જેમાં ડાઉ જોન્સમાં ૩૪૭ પોઈન્ટનો અને નાસ્ડેકમાં ૨૪૮ પોઈન્ટનો ઘટાડો નોંધાયો હતો. ત્યારબાદ આજે એશિયન શેરબજારોમાં પણ મોટો ઘટાડો જોવા મળ્યો હતો. જાપાનનો નિક્કી લગભગ ૮૦૦ પોઈન્ટ નીચે ટ્રેડ થઈ રહ્યો હતો. જ્યારે હેંગ સેંગ ઈન્ડેક્સમાં આશરે ૨૦૦ પોઈન્ટનો ઘટાડો થયો હતો. સેન્સેક્સ અને નિફ્ટી માટે મહત્વપૂર્ણ સૂચક ગણાતા ગિફ્ટ નિફ્ટી દ્વારા પણ બજારમાં ઘટાડાના સંકેતો મળી રહ્યા હતા.

શેરબજારમાં આવેલા આ ઘટાડા વચ્ચે, સૌથી વધુ અસરગ્રસ્ત શેરોમાં બજાજ ફાઇનાન્સ (૨.૧૦ ટકા ઘટાડો), એચડીએફસી બેંક (૧.૭૦ ટકા ઘટાડો), કોટક બેંક (૧.૫૦ ટકા ઘટાડો), રિલાયન્સ (૧.૩૦ ટકા ઘટાડો) અને ઇન્ફોસીસ (૧.૪૦ ટકા ઘટાડો)નો સમાવેશ થાય છે. મિડ-કેપ સેગમેન્ટમાં, પોલિસીબજારના શેરમાં ૪ ટકાનો ઘટાડો થયો હતો, જ્યારે આઈડીએફસી ફર્સ્ટ બેંકના શેરમાં ૨.૧૫ ટકાનો ઘટાડો નોંધાયો હતો.