ભારતીય ક્રિકેટ સ્ટાર સ્મૃતિ મંધાના અને સંગીતકાર પલાશ મુચ્છલના લગ્ન આજે ભવ્ય રીતે થવાના હતા, પરંતુ અચાનક બનેલી ઘટનાએ લગ્ન મુલતવી રાખ્યા છે. લગ્નમાં અસંખ્ય સેલિબ્રિટીઓ અને બંને પરિવારના નજીકના સંબંધીઓ હાજર રહ્યા હતા. સમારોહ પૂરજોશમાં ચાલી રહ્યો હતો ત્યારે અચાનક એમ્બ્યુલન્સના સાયરનના અવાજથી સ્થળનું વાતાવરણ બદલાઈ ગયું.

હકિકતમાં, સ્મૃતિ મંધાનાના પિતા લગ્ન દરમિયાન અચાનક બીમાર પડી ગયા. પરિણામે, લગ્ન અનિશ્ચિત સમય માટે મુલતવી રાખવામાં આવ્યા છે. મંધાનાની મેનેજમેન્ટ ટીમના સભ્ય તુહિન મિશ્રાએ પુષ્ટિ આપી કે સ્મૃતિના પિતા બીમાર છે, જેના કારણે લગ્ન અનિશ્ચિત સમય માટે મુલતવી રાખવામાં આવ્યા છે. 

તાજેતરમાં, ભારતીય મહિલા ક્રિકેટ ટીમે વર્લ્ડ કપ જીત્યો. ઓપનિંગ બેટ્સમેન સ્મૃતિ મંધાનાએ ભારતની જીતમાં મુખ્ય ભૂમિકા ભજવી હતી. ટુર્નામેન્ટ જીત્યા પછીના દિવસોમાં, મંધાના અને પલાશના લગ્ન પહેલાના ઉજવણીના અસંખ્ય વિડિઓઝ અને ફોટા ઓનલાઈન ફરતા થયા છે. જોકે, લગ્નના દિવસે તેના પિતાની તબિયત અચાનક બગડવાથી બધી તૈયારીઓ પર પાણી ફરી વળ્યું.