આજે સુપ્રીમ કોર્ટે વીર સાવરકર માનહાનિ કેસમાં રાહુલ ગાંધીની અરજી પર સુનાવણી કરી હતી. આ દરમિયાન સુપ્રીમ કોર્ટે વીર સાવરકર પરના તેમના નિવેદન બદલ રાહુલ ગાંધીની ટીકા કરી હતી. કોર્ટે કહ્યું કે, રાહુલ ગાંધીએ સ્વતંત્રતા સેનાનીઓ વિશે બેજવાબદાર નિવેદનો ન આપવા જોઈએ. સુપ્રીમ કોર્ટે કહ્યું કે, મહાત્મા ગાંધી પોતે સાવરકરનું સન્માન કરતા હતા. ત્યાં જ તેમના દાદી ઇન્દિરા ગાંધીએ તેમને એક પત્ર લખ્યો હતો.

સુપ્રીમ કોર્ટે રાહુલ ગાંધીને ચેતવણી આપતા કહ્યું કે, તમે સ્વતંત્રતા સેનાનીઓના ઇતિહાસને સમજ્યા વિના આવું નિવેદન આપી શકતા નથી. કોર્ટે ચેતવણી આપી હતી કે, જો રાહુલ ગાંધી ભવિષ્યમાં આવું નિવેદન આપશે તો અમે આ મામલાની જાતે જ નોંધ લઈશું અને સુનાવણી કરીશું. આપણને આઝાદી અપાવનારા સ્વાતંત્ર્ય સેનાનીઓ સાથે તમે આવું કેવી રીતે વર્તન કરી શકો છો? કાલે તમે મહાત્મા ગાંધીને અંગ્રેજોના નોકર કહેશો. કારણ કે, તેમણે સાવરકર માટે "ફેથફુલ સર્વન્ટ" લખ્યું હતું. કોર્ટે કોંગ્રેસના સાંસદ રાહુલ ગાંધીને ભવિષ્યમાં આવા નિવેદનો ન આપવાની ચેતવણી આપી છે.

ન્યાયાધીશ દીપાંકર દત્તા અને ન્યાયાધીશ મનમોહનની બેન્ચે રાહુલ ગાંધીને ભવિષ્યમાં આવું કોઈ નિવેદન ન આપવાની ચેતવણી પણ આપી હતી. બેન્ચે કોંગ્રેસના નેતા વતી હાજર રહેલા વરિષ્ઠ વકીલ અભિષેક સિંઘવીને પૂછ્યું કે શું રાહુલ ગાંધી જાણતા હતા કે મહાત્મા ગાંધી પણ બ્રિટિશરો સાથેના સંદેશાવ્યવહારમાં "તમારા વિશ્વાસુ સેવક" જેવા શબ્દોનો ઉપયોગ કરતા હતા.

સુપ્રીમ કોર્ટે ફરિયાદી નૃપેન્દ્ર પાંડેને પણ નોટિસ ફટકારી હતી, જેમણે રાહુલ ગાંધી પર રેલી દરમિયાન સાવરકરનું "ઇરાદાપૂર્વક" અપમાન કરવાનો આરોપ મૂક્યો હતો. કોર્ટે ઉત્તર પ્રદેશ સરકારને પણ નોટિસ જારી કરીને જવાબ માંગ્યો છે.

આ જ સમયે, સુપ્રીમ કોર્ટે અલ્હાબાદ હાઈકોર્ટના આદેશ પર સ્ટે મૂકી દીધો છે, જેણે કોંગ્રેસના સાંસદ રાહુલ ગાંધીને સાવરકર માનહાનિ કેસમાં યુપીની ટ્રાયલ કોર્ટ દ્વારા જારી કરાયેલા સમન્સને રદ કરવાનો ઇનકાર કર્યો હતો.