47 વર્ષીય મેટ્રેવેલીએ 1999માં એમઆઈ-6માં પોતાની કારકિર્દી શરૂ કરી હતી અને હાલમાં તે એજન્સીના ટેકનોલોજી અને નવીનતા વિભાગના ડિરેક્ટર છે. તે વર્તમાન એમઆઈ-6 ચીફ રિચાર્ડ મૂરનું સ્થાન લેશે, જે 2020થી આ પદ પર હતા.

બ્લેઇસ મેટ્રેવેલીએ એમઆઈ-6 અને બ્રિટનની સ્થાનિક ગુપ્તચર એજન્સી એમઆઈ-5 બંનેમાં ઘણા મહત્વપૂર્ણ હોદ્દાઓ પર કામ કર્યું છે. તેણીએ કેમ્બ્રિજ યુનિવર્સિટીમાંથી સામાજિક માનવશાસ્ત્રનો અભ્યાસ કર્યો છે અને તેણીની કારકિર્દીનો મોટાભાગનો સમય મધ્ય પૂર્વ અને યુરોપમાં ઓપરેશનલ ભૂમિકાઓમાં વિતાવ્યો છે.

વડાપ્રધાન કીર સ્ટાર્મરે તેમની નિમણૂક પર ખુશી વ્યક્ત કરી અને કહ્યું, 'બ્લેઝ મેટ્રેવેલીની ઐતિહાસિક નિમણૂક એવા સમયે આવી છે જ્યારે આપણી ગુપ્તચર તંત્રની ભૂમિકા પહેલા કરતાં વધુ મહત્વપૂર્ણ બની ગઈ છે. બ્રિટન અભૂતપૂર્વ જોખમોનો સામનો કરી રહ્યું છે. પછી ભલે તે આપણા સમુદ્રમાં જાસૂસી જહાજો મોકલતા દુશ્મનો હોય કે આપણી જાહેર સેવાઓમાં ખલેલ પહોંચાડતા સાયબર હુમલાખોરો હોય.'

તેમની નિમણૂક પર પ્રતિક્રિયા આપતા, બ્લેઝ મેટ્રેવેલીએ કહ્યું, 'મને મારી સેવા (એમઆઈ-6)નું નેતૃત્વ કરવા માટે પસંદ કરવામાં આવ્યાનો ગર્વ અને સન્માન છે. એમઆઈ-6, એમઆઈ-5 અને જીસીએસક્યુ સાથે, બ્રિટિશ લોકો અને વિદેશમાં બ્રિટનના હિતોની સુરક્ષામાં મહત્વપૂર્ણ ભૂમિકા ભજવે છે. હું આ મિશનને આગળ વધારવા માટે અમારા હિંમતવાન અધિકારીઓ, એજન્ટો અને આંતરરાષ્ટ્રીય ભાગીદારો સાથે કામ કરવા તૈયાર છું.'

બ્રિટિશ ગુપ્તચર એજન્સીઓમાં મહિલાઓ માટે આ નિમણૂક એક મહત્વપૂર્ણ સિદ્ધિ છે. એમઆઈ-5 અને જીસીએચક્યું જેવી એજન્સીઓમાં પહેલા પણ મહિલા વડાઓ રહી ચૂક્યા છે. સ્ટેલા રિમિંગ્ટન, એલિઝા મેનિંગહામ-બુલર (એમઆઈ-5) અને એન કીસ્ટ-બટલર (જીસીએચક્યુ). પરંતુ બ્લેઇસ મેટ્રેવેલી એમઆઈ-6નું નેતૃત્વ કરનારી પ્રથમ મહિલા બનશે.