મહાનગર પાલિકા દ્વારા એપ્રિલ, મે મહિના દરમિયાન રિબેટ યોજના ચાલુ કરાતાની સાથે જ  આ વખતે પ્રથમ વખતે શાસક પક્ષે રિબેટનો લાભ લેનાર સિવાયના બાકીદારો સામેથી વસુલાત કરવા લેશન પકડાવી દેવાયુ છે. એટલુ જ નહીં વિક્રમી રૂપિયા ૧૭૦ કરોડની આવકના દાવા સામે ૨૦૦ કરોડની વસુલાતનો લક્ષ્યાંક આપી દેવાયો છે.
કરવેરામાં બે મહિના સુધી રિબેટ યોજના ચાલે છે. એટલે બાકીદારો પાસેથી વસુલાત કરવામાં મ્યુ. તંત્ર હાથ જોડીને બેસી રહે છે. જે કરદાતાઓને રિબેટનો લાભ લેવો છે તે કરવેરો ભરવાના જ છે. પણ જે બાકીદારો છે તેના પેટનુ પાણી હલતુ નથી. પરંતુ પ્રથમ વખત રિબેટની સાથોસાથ બાકીદારો પાસેથી ઉઘરાણી કરવા ચેરમેને સુચના આપી હતી.
 મેયર ભરત બારડ તથા ચેરમેન રાજુ રાબડિયાના અધ્યક્ષ સ્થાને નાયબ કમિશનર, આસી.કમિશનર, ઘરવેરા વિભાગ, રીકવરી ટીમ, એસેસમેન્ટ વિભાગ, ઓડિટ વિભાગ, લિગલ વિભાગ તથા કોમ્પ્યુટર વિભાગના શાખાધિકારી તથા કર્મચારીઓની ઉપસ્થિતિમાં સંયુક્ત મીટિંગનું આયોજન કરવામાં આવ્યુ હતુ.
આ મિટિંગમાં મેયર દ્વારા સર્વોને આવકારી મિલ્કત વેરાની ૧૬૯.૬૦ કરોડની વિક્રમી વસુલાત તથા વર્ષ દરમ્યાન દરેક વિભાગોએ કરેલ ઉત્કૃષ્ટ કામગીરી બદલ અભિનંદન પાઠવી પ્રોત્સાહન આપ્યુ હતુ. 
પરંતુ હવે પછીની મુશ્કેલીઓ હળવી કરવા માટેના મુદ્દાઓની ચર્ચા વિચારણા કરવામાં આવી હતી તેમજ વિભાગના શાખાધિકારીઓને આગામી દિવસોમાં મહત્તમ આવક આવે તે માટે માઇક્રો પ્લાનિંગ થકી રીકવરી કરવા સુચના આપવામાં આવી હતી. સ્ટાફ ઓછો હોવાનુ બહાનું  નહીં બતાવવા  અને રિબેટની સાથોસાથ બાકીદારો પાસેથી ઉઘરાણી કરવા તાકીદ કરી હતી. જેથી કામચોર કર્મચારીઓની ઉંઘ હરામ થઈ ગઈ છે. લોકોના પ્રશ્નોનો ઝડપથી નિકાલ કરવા પ્રક્રિયાનું સરળીકરણ કરવા તથા આગામી નાણાંકીય વર્ષમાં મહત્તમ પ્રયાસો થકી ૨૦૦ કરોડથી વધુની આવક આવે તે માટે સુચના આપવામા આવી હતી.