યુએસએ તરફથી લાદવામાં આવેલા પારસ્પરિક ટેરિફ વચ્ચે, ભારત બાકીના વિશ્વ સાથે વેપાર કરારો પર ચર્ચા કરી રહ્યું છે. ભારત અમેરિકા સાથે દ્વિપક્ષીય કરાર ઝડપથી પૂર્ણ કરવાનો પ્રયાસ કરી રહ્યું છે. ઉપરાંત, યુરોપિયન યુનિયન, ન્યુઝીલેન્ડ, ઓમાન, બ્રિટન જેવા અન્ય દેશો સાથે મુક્ત વેપાર અને દ્વિપક્ષીય કરાર પણ ટૂંક સમયમાં પૂર્ણ થશે. આનાથી ભારતીય ઉદ્યોગ સાહસિકોને નવા દેશોમાં વેપાર કરવાની અનુકૂળ તક મળશે. હાલમાં અમેરિકાની વેપાર નીતિને ધ્યાનમાં રાખીને અન્ય દેશોએ પણ વેપાર કરારો અંગે વાટાઘાટો ઝડપી બનાવવાની ઈચ્છા વ્યક્ત કરી છે.

હાલમાં, ભારત દ્વારા ન્યુઝીલેન્ડ, અમેરિકા, બ્રિટન, ઈયુ, ઓમાન, પેરુ, કતાર અને શ્રીલંકા જેવા 20 થી વધુ દેશો સાથે વેપાર કરારના વાટાઘાટો કરવામાં આવી રહી છે. આ કરારોને ટૂંક સમયમાં આખરી ઓપ અપાય તેવી શક્યતા છે. જોકે, સીઆઈઆઈ એમએસએમઈ કાઉન્સિલે કહ્યું કે, કેટલાક પડકારો પણ છે. ભારતે દક્ષિણ એશિયાના કેટલાક દેશો સાથે કરારો કર્યા છે. ચીન તે દેશોમાં પોતાના એકમો સ્થાપીને ભારતને સામાન મોકલી રહ્યું છે. આવી સ્થિતિમાં સાવધાન રહેવાની જરૂર છે.

જો આયાત શુલ્ક ઘટાડવામાં આવે છે અથવા સંપૂર્ણપણે નાબુદ કરવામાં આવે તો વેપાર સસ્તો બની જશે. ક્વોટા, લાઇસન્સ અને ટેકનિકલ નિયમો ઘટાડીને અન્ય દેશોમાં માલસામાન અને સેવાઓનું વેચાણ કરવાનું સરળ બનાવી શકાય છે. વિદેશી કંપનીઓના પૈસા સુરક્ષિત રહે છે અને કોઈ વિવાદ થાય તો તેને ઉકેલવા માટે કાયદો ઉપલબ્ધ હોય છે. પેટન્ટ, કોપીરાઈટ, ટ્રેડમાર્ક જેવી બૌદ્ધિક સંપત્તિને રક્ષણ મળે છે, જેથી શોધકોના અધિકારોનું રક્ષણ થાય. નાની કંપનીઓ અને વેપારીઓને પણ વિદેશમાં માલ વેચવાની તક મળે છે અને તેથી લોજિસ્ટિક્સ ખર્ચમાં ઘટાડો થાય છે.

એપ્રિલ 2024 થી ફેબ્રુઆરી 2025 સુધીમાં સુરત અને દેશના અન્ય હીરા બજારોમાંથી રૂ. 11861 કરોડના કટ અને પોલિશ્ડ હીરાની નિકાસ કરવામાં આવી હતી. જો કે, આ અગાઉના આંકડા કરતા 16% ઓછું છે. ખરેખર, હીરામંડી આ દિવસોમાં મંદીની ઝપેટમાં છે. આવી સ્થિતિમાં અમેરિકામાં હીરા મોંઘા થઈ શકે છે અને તેની સાથે તેની માંગમાં પણ ઘટાડો થઈ શકે છે. સુરતમાં ઉત્પાદિત 50 ટકાથી વધુ હીરા અમેરિકા મોકલવામાં આવે છે. અમેરિકી સરકારે જેમ્સ એન્ડ જ્વેલરી સેગમેન્ટ પર ટેરિફ લાદ્યા બાદ હીરાના વ્યવસાયને અસર થશે અને તેની સીધી અસર નિકાસ પર પડશે.

જેમ્સ એન્ડ જ્વેલરી એક્સપોર્ટ પ્રમોશન કાઉન્સિલના ભૂતપૂર્વ ચેરમેન વિપુલ શાહે જણાવ્યું હતું કે, છેલ્લા બે વર્ષથી હીરાની નિકાસ ઘટી રહી છે અને આ ટેરિફ હીરા ઉદ્યોગને વધુ પ્રતિકૂળ અસર કરી શકે છે. ઇન્ડિયન ડાયમંડ ઇન્સ્ટિટ્યૂટના વડા દિનેશ નાવડિયાએ જણાવ્યું હતું કે નવા ટેરિફથી અમેરિકામાં હીરાની કિંમતમાં 26%નો ઉછાળો આવશે. હીરાના ભાવ વધશે તો તેની સીધી અસર બિઝનેસ પર પડશે. ગુજરાતમાં લગભગ 40% હીરાના કારખાનાઓએ તેમના શટર ડાઉન કરી દીધા છે, જેના કારણે અત્યાર સુધીમાં એકથી દોઢ લાખ કામદારોએ તેમની નોકરી ગુમાવી છે. કામના કલાકો અને પગારમાં પણ ઘટાડો થયો છે.