ભારતીય શેરબજાર માટે આજનો ગુરુવાર 'બ્લેક થર્સડે' સાબિત થયો છે. મિડલ ઈસ્ટમાં વધતા જતા તણાવ અને અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના એક આક્રમક નિવેદને વૈશ્વિક રોકાણકારોના સેન્ટિમેન્ટને હચમચાવી દીધા છે. આ નકારાત્મક અસરોને પગલે ભારતીય બજારમાં ચોમેર વેચવાલી જોવા મળી હતી, જેના કારણે સેન્સેક્સ અને નિફ્ટી બંને મહત્વની સપાટીઓ તોડીને નીચે ગબડ્યા છે. રોકાણકારોની અબજો રૂપિયાની સંપત્તિ આજે મિનિટોમાં ધોવાઈ ગઈ છે. સેન્સેક્સમાં 1526 પોઈન્ટનો તોતિંગ ઘટાડો થયો છે.

બજારમાં આજના કડાકાનું મુખ્ય કારણ અમેરિકાના પૂર્વ રાષ્ટ્રપતિ ડોનાલ્ડ ટ્રમ્પનું ઈરાન વિરુદ્ધનું અત્યંત ઉશ્કેરણીજનક નિવેદન માનવામાં આવે છે. ટ્રમ્પે યુદ્ધની જ્વાળાઓને ભડકાવતા કહ્યું હતું કે, અમે હજુ બે-ત્રણ અઠવાડિયા સુધી ઈરાનને હચમચાવીશું અને તેને પાષાણ યુગમાં ધકેલી દઈશું.આ નિવેદન બાદ આંતરરાષ્ટ્રીય સ્તરે યુદ્ધની ભીતિ વધી ગઈ છે. મિડલ ઈસ્ટમાં અનિશ્ચિતતા વધતા ક્રૂડ ઓઈલના ભાવમાં ઉછાળો આવવાની અને સપ્લાય ચેઈન ખોરવાઈ જવાની આશંકાએ રોકાણકારોમાં ગભરાટ ફેલાવ્યો છે.

બોમ્બે સ્ટોક એક્સચેન્જ (બીએસઇ)નો બેન્ચમાર્ક ઇન્ડેક્સ સેન્સેક્સ આજે શરૂઆતથી જ દબાણ હેઠળ રહ્યો હતો. દિવસના અંતે સેન્સેક્સમાં 1,526 પોઈન્ટ જેટલો તોતિંગ ઘટાડો નોંધાયો હતો. સેન્સેક્સ 73,134.32 પર બંધ થયો હતો, આજે તેની નીચી સપાટી 71,608.48 પર જોવા મળી હતી. બજારની આ નીચી સપાટીએ પહોંચતા જ નાના રોકાણકારોથી લઈને મોટા પોર્ટફોલિયો મેનેજર્સમાં પ્રોફિટ બુકિંગનો દોર શરૂ થયો હતો. બેન્કિંગ, આઈટી અને ઓટો સેક્ટરના શેરોમાં ભારે વેચવાલી જોવા મળી હતી.

નેશનલ સ્ટોક એક્સચેન્જ (એનએસઇ)ના નિફ્ટી-50 ઇન્ડેક્સમાં પણ આજે ખરાબ સ્થિતિ જોવા મળી હતી. નિફ્ટી તેની મનોવૈજ્ઞાનિક રીતે મહત્વની ગણાતી 22,700ની સપાટી તોડીને નીચે ઉતરી ગયો હતો. દિવસ દરમિયાન નિફ્ટીમાં 445 થી 470 પોઈન્ટનું મોટું ગાબડું જોવા મળ્યું હતું. બજારના જાણકારોના મતે, નિફ્ટીમાં આટલો મોટો કડાકો સૂચવે છે કે આગામી દિવસોમાં પણ બજારમાં વોલેટિલિટી (અસ્થિરતા) જળવાઈ રહી શકે છે.

મિડલ ઈસ્ટમાં યુદ્ધ જેવી સ્થિતિ સર્જાતા ઘરેલું બજારમાં પ્રોફિટ બુકિંગનો માહોલ તીવ્ર બન્યો છે. ખાસ કરીને જે રોકાણકારો લાંબા સમયથી નફામાં હતા, તેમણે વધુ નુકસાનથી બચવા માટે પોતાની પોઝિશન હળવી કરવાનું પસંદ કર્યું છે. બીજી બાજુ, વિદેશી સંસ્થાકીય રોકાણકારો દ્વારા પણ ભારતીય બજારમાંથી નાણાં પાછા ખેંચવાની પ્રક્રિયા તેજ બની છે, જેની સીધી અસર માર્કેટ કેપિટલાઇઝેશન પર પડી છે.

નિષ્ણાતો સલાહ આપી રહ્યા છે કે હાલના તબક્કે બજારમાં નવું રોકાણ કરતા પહેલા વૈશ્વિક સંકેતો પર નજર રાખવી જરૂરી છે. જો યુદ્ધની સ્થિતિ વધુ વણસશે, તો ભારતીય બજાર હજુ પણ વધુ નીચે જઈ શકે છે. આજના 'બ્લેક થર્સડે' એ સાબિત કર્યું છે કે વૈશ્વિક રાજનીતિની એક નાની સરખી ચિનગારી પણ શેરબજારના આંકડાઓને ખાક કરી શકે છે.

ચાંદીમાં 13,600, સોનામાં 2,500થી વધુનો કડાકો

વૈશ્વિક બજારમાં ડોનાલ્ડ ટ્રમ્પના ઈરાન યુદ્ધ અંગેના આક્રમક નિવેદનોએ કિંમતી ધાતુઓના બજારને પત્તાના મહેલની જેમ વેરવિખેર કરી દીધું છે. ભારતીય વાયદા બજારમાં આજે સોના અને ચાંદીના ભાવમાં ઐતિહાસિક કડાકો જોવા મળ્યો છે. ખાસ કરીને ચાંદીના ભાવમાં રૂ.13,613 જેટલું તોતિંગ ગાબડું પડતા ભાવ રૂ.2.30 લાખની નીચે ઉતરી ગયા હતા, જેને પગલે ટ્રેડર્સમાં ફાળ પડી છે અને બજારમાં 'લોઅર સર્કિટ' જેવો માહોલ સર્જાયો છે. બીજી તરફ, સોનાના ભાવમાં પણ રૂ.2,547 સુધીનો મોટો ઘટાડો નોંધાતા રોકાણકારોના કરોડો રૂપિયા ધોવાઈ ગયા છે. સોનું હાલ રૂ.1,51,600 ની આસપાસ ટ્રેડ થઈ રહ્યું છે.