રાજકોટ શહેરના પોપટપરા જેલ વિસ્તાર નજીક આવેલી માઉન્ટેન પોલીસ લાઈનમાં ગઈકાલે એક દિલધડક ઘટના સામે આવી હતી, જ્યાં રેલનગર ફાયર સ્ટેશનની ટીમે ભારે સમયસૂચકતા અને બહાદુરી બતાવીને બંધ રૂમમાં ફસાયેલા બે માસૂમ બાળકોનો આબાદ બચાવ કર્યો હતો. ફાયર બ્રિગેડના જવાનોની આ ત્વરિત કામગીરીને પગલે એક મોટી દુર્ઘટના ટળી હતી અને પરિવારે રાહતનો શ્વાસ લીધો હતો. આ ઘટનાને પગલે સ્થાનિક લોકોએ ફાયરના જવાનોની કામગીરીને મુક્તકંઠે બિરદાવી હતી.

View this post on Instagram

A post shared by Aajkaal (@aajkaaldaily)

મળતી વિગતો અનુસાર, માઉન્ટેન પોલીસ લાઈનમાં રહેતા એક પરિવારના બે બાળકો 8 વર્ષીય શૌર્યરાજસિંહ અને 6 વર્ષીય પ્રિયાંશીબા રૂમમાં અંદરથી દરવાજો બંધ કરીને સૂતા હતા. જોકે, અચાનક દરવાજાનું લોક જામ થઈ જતાં અથવા અન્ય કોઈ તકનીકી ખામીને કારણે દરવાજો અંદરથી ખુલ્યો ન હતો. બાળકોએ દરવાજો ખોલવાનો ઘણો પ્રયત્ન કર્યો પરંતુ તેઓ અંદર જ ફસાઈ ગયા હતા. બહાર ઉભેલા વાલીઓએ પણ દરવાજો તોડવા કે ખોલવાના તમામ પ્રયાસો કર્યા, પરંતુ સફળતા ન મળતા પરિવાર ભારે ચિંતામાં મુકાયો હતો અને બાળકો પણ ગભરાઈ ગયા હતા.

પરિસ્થિતિ વણસતી જોઈને પરિવારે તાત્કાલિક આ અંગે રેલનગર ફાયર સ્ટેશનને જાણ કરી હતી. ઘટનાની ગંભીરતાને સમજીને ફાયર ઓપરેટર સિધ્ધરાજસિંહ જાડેજા અને તેમનો અનુભવી સ્ટાફ કાફલા સાથે ગણતરીની મિનિટોમાં જ ઘટનાસ્થળે દોડી આવ્યો હતો. દરવાજો મુખ્ય બાજુથી તોડવામાં સમય બગડે તેમ હોવાથી ફાયરની ટીમે અત્યંત જોખમી પણ સચોટ પ્લાન બનાવ્યો હતો.

ફાયર ઓપરેટર સિધ્ધરાજસિંહ અને તેમની ટીમે અદભુત સમયસૂચકતા વાપરીને બાજુના રૂમની બારી કે ગેલેરી મારફતે ઘરમાં પ્રવેશવાનું નક્કી કર્યું હતું. પોતાની જાનના જોખમે જવાનોએ ખૂબ જ કુશળતાપૂર્વક બાજુમાંથી ઘરમાં પ્રવેશ કર્યો અને અંદર પહોંચીને બંને બાળકોને આશ્વાસન આપ્યું હતું. ટીમે કોઈ પણ પ્રકારની જાનહાની કે બાળકોને સહેજ પણ ઈજા પહોંચાડ્યા વિના બંનેને સહીસલામત રીતે રૂમની બહાર કાઢ્યા હતા. બાળકોને સુરક્ષિત જોઈને માતા-પિતાની આંખોમાં હર્ષના આંસુ આવી ગયા હતા અને સમગ્ર વિસ્તારમાં ફાયર બ્રિગેડના જવાનો માટે આદરની લાગણી વ્યાપી ગઈ હતી.