પહેલગામ આંતકી હુમલા બાદ દેશભરમાંથી ઘુષણખોરોને ઝડપી લઇ દેશ નિકાલ કરવાની કેન્દ્ર સરકાર દ્વારા અપાયેલી સૂચનાના પગલે રાજકોટ જિલ્લામાંથી અત્યાર સુધીમાં 12 બાંગ્લાદેશી અને 3 પાકિસ્તાની નાગરિકો ઝડપાઇ ચૂક્યા છે. ત્યારે ગેરકાયદે રહેતી વધુ બે બાંગ્લાદેશી મહિલાઓને પોલીસે ઝડપી લીધી છે. મેટોડા જીઆઈડીસી પોલીસ મથકના પીઆઇ એસ.એચ.શર્માની રાહબરી હેઠળ ટીમ તપાસમાં હતી દરમિયાન મેટોડા જીઆઈડીસી ગેઇટ નં. ૨ની બાજુમાં આવેલા બસ સ્ટેન્ડ પાસે ઉભેલી પાંખીબેગમ ઉર્ફે સુમી ખલીલ સરદાર (ઉ.વ.૩૬)ને ઝડપી લીધી હતી.આગાઉ આ મહિલા ચોટીલામાં રહેતી હતી. જ્યાંથી મેટોડા જીઆઈડીસીમાં આવી હતી. જે અંગે બાતમી મળતાં પોલીસે તેને ઝડપી લીધી હતી. તેના મોબાઇલ ફોનમાંથી બાંગ્લાદેશના પીપલ્સ રિપબ્લીક સરકારનું રાષ્ટ્રીય ઓળખપત્ર પણ મળી આવ્યું હતું.

બાંગ્લાદેશી મહિલાની પૂછપરછ કરતા તે કામની શોધમાં મેટોડા આવ્યાની અને છેલ્લા એક માસથી તે ચોટીલા ખાતે રહેતી હોવાની વાત જણાવી હતી.. હાલ બાંગ્લાદેશી મહિલાને નજરકેદમાં રાખી પૂછપરછ શરૂ કરાઇ રહી છે.

જયારે શાપર વેરાવળ પોલીસ મથકના પીઆઇ આર.બી.રાણાની રાહબરી હેઠળ ટીમ તપાસમાં હતી દરમિયાન શાપરના બસ સ્ટેન્ડ પાસેથી હાસીબેન હમઝા મંડલ (ઉ.વ. 28)ને ઝડપી લીધી હતી. તેની પૂછતાછ કરતાં તે હાલ અમદાવાદ ગીતાનગરમાં રહેતી હોવાનું અને મૂળ બાંગ્લાદેશના રૂગંસના બોપરા ગામે રહેતી હાસીબેન હમઝા મંડલ (ઉ.28) હોવાનું જણાવતા પેાલીસે તેની અટકાયત કરી વધુ પુછપરછ કરી હતી.