દેશમાં ડિજિટલ પેમેન્ટને સરળ અને વધુ સુરક્ષિત બનાવવા તરફ એક મોટું પગલું લેવામાં આવ્યું છે. હવે, યુનિફાઇડ પેમેન્ટ્સ ઇન્ટરફેસ (યુપીઆઈ) દ્વારા વ્યવહાર કરતા યુઝર્સને ચુકવણી માટે પીન દાખલ કરવાની જરૂર રહેશે નહીં. તેના બદલે, તેઓ ચહેરાની ઓળખ અથવા ફિંગરપ્રિન્ટનો ઉપયોગ કરીને તેમના પેમેન્ટને મંજૂરી આપી શકશે. આ નવી સુવિધા 8 ઓક્ટોબરથી અમલમાં આવશે. આ પગલું વૈકલ્પિક પ્રમાણીકરણને મંજૂરી આપતી આરબીઆઈ માર્ગદર્શિકા સાથે સુસંગત છે.

એનપીસીઆઈ (જે યુપીઆઈનું સંચાલન કરે છે) મુંબઈમાં ગ્લોબલ ફિનટેક ફેસ્ટિવલમાં આ સુવિધા પ્રદર્શિત કરવા જઈ રહ્યું છે. આ ડિજિટલ ચુકવણીઓને ઝડપી, સુરક્ષિત અને વધુ અનુકૂળ બનાવશે. અહેવાલ મુજબ, આ નવી સુવિધા ભારત સરકારની આધાર સિસ્ટમમાં સંગ્રહિત બાયોમેટ્રિક ડેટા દ્વારા પેમેન્ટને પ્રમાણિત (ચકાસણી) કરશે. આનો અર્થ એ છે કે યુઝર્સના ચહેરા અથવા ફિંગરપ્રિન્ટ્સ તેમના આધાર ડેટા સાથે મેચ કરવામાં આવશે, જેનાથી ચુકવણીઓ પર પ્રક્રિયા કરી શકાશે.

નવી આઈબીઆઈ એડવાઈઝરી

આ પગલું ભારતીય રિઝર્વ બેંકના તાજેતરના માર્ગદર્શિકા સાથે સુસંગત છે, જેણે ડિજિટલ વ્યવહારો માટે વૈકલ્પિક પ્રમાણીકરણ પદ્ધતિઓને મંજૂરી આપી હતી. આનાથી ડિજિટલ પેમેન્ટમાં સુરક્ષા અને યુઝર્સ અનુભવ બંનેમાં સુધારો થવાની અપેક્ષા છે.

યુપીઆઈ અનુભવ સરળ બનશે

હાલમાં, યુઝર્સે દરેક યુપીઆઈ વ્યવહાર માટે 4- અથવા 6-અંકનો પીન દાખલ કરવો જરૂરી છે. એકવાર નવી સુવિધા લાગુ થઈ જાય, પછી ફેસ સ્કેન અથવા ફિંગરપ્રિન્ટ સેન્સરનો ઉપયોગ કરીને ચુકવણીઓ તાત્કાલિક પ્રમાણિત કરવામાં આવશે. આનાથી વ્યવહારનો સમય ઓછો થશે, સુરક્ષા વધશે અને યુઝર્સ અનુભવ વધુ સરળ બનશે. નિષ્ણાતો કહે છે કે બાયોમેટ્રિક પ્રમાણીકરણ છેતરપિંડીની શક્યતા ઘટાડશે, કારણ કે ચહેરા અથવા ફિંગરપ્રિન્ટની નકલ કરવી મુશ્કેલ છે. જો કે, ડેટા સુરક્ષા અને ગોપનીયતા સુનિશ્ચિત કરવા માટે એનપીસીઆઈ અને યુઆઈડીએઆઈ વચ્ચે મજબૂત તકનીકી પ્રોટોકોલ અપનાવવામાં આવશે.