જર્મનીથી એક અત્યંત ચોંકાવનારા અને ગંભીર સમાચાર સામે આવી રહ્યા છે. પશ્ચિમી જર્મનીમાં આવેલા સ્પેંગડાહલેમ એર બેઝ (Spangdahlem Air Base) પર અમેરિકી વાયુસેનાનું અત્યાધુનિક F 16 લડાકુ વિમાન અકસ્માતગ્રસ્ત થઈને ભયાનક રીતે ક્રેશ થઈ ગયું છે. આ અકસ્માત એટલો ભીષણ હતો કે વિમાન સળગીને સંપૂર્ણપણે કાટમાળમાં ફેરવાઈ ગયું હતું. જોકે, રાહતની વાત એ રહી કે આ ભયાનક દુર્ઘટનામાં વિમાનના પાયલટનો આબાદ બચાવ થયો છે.

મળતી માહિતી મુજબ, આ અકસ્માત જર્મનીના સ્પેંગડાહલેમ એર બેઝ પર રનવેની બિલકુલ નજીક બન્યો હતો. વિમાન ક્રેશ થતાં જ ચારેય તરફ સળગતા કાટમાળના ઢગલા અને કાળા ધુમાડાના ગોટેગોટા જોવા મળ્યા હતા. એરબેઝના વરિષ્ઠ અધિકારીઓએ આ ઘટનાની પુષ્ટિ કરતા જણાવ્યું છે કે વિમાન જમીન સાથે અથડાય તે પહેલાં જ પાયલટે પોતાની અદ્ભુત સમયસૂચકતા અને મનોબળ દર્શાવીને વિમાનમાંથી સફળતાપૂર્વક ઇજેક્ટ (Eject) કરી લીધું હતું.

પેરાશૂટની મદદથી સુરક્ષિત રીતે જમીન પર ઊતરેલા પાયલટને ઇમરજન્સી મેડિકલ ટીમ દ્વારા તાત્કાલિક હોસ્પિટલ પહોંચાડવામાં આવ્યા હતા. હાલમાં હોસ્પિટલમાં તેમની સારવાર ચાલી રહી છે અને તબીબોના જણાવ્યા મુજબ તેમની સ્થિતિ જોખમથી બહાર છે. જો પાયલટે સમયસર ઇજેક્ટ કરવાનો નિર્ણય ન લીધો હોત, તો મોટી જાનહાનિ સર્જાઈ શકી હોત.

​​​​​​​અકસ્માત બાદનો એક ભયાનક વીડિયો પણ સામે આવ્યો છે, જેમાં રનવે પાસે વિખરાયેલો વિમાનનો બળેલો કાટમાળ અને ફાયર ફાઇટર્સ દ્વારા ચલાવવામાં આવી રહેલું રાહત-બચાવ કાર્ય સ્પષ્ટપણે જોઈ શકાય છે. વીડિયો પરથી જ અંદાજ લગાવી શકાય છે કે આ અકસ્માત કેટલો ખતરનાક હતો. આ ઘટનાને ગંભીરતાથી લઈને અમેરિકી વાયુસેનાએ અકસ્માતના વાસ્તવિક અને તકનીકી કારણો જાણી શકાય તે માટે ઉચ્ચ સ્તરીય તપાસના આદેશ જારી કરી દીધા છે.