ગુજરાતમાં શિયાળાની શરૂઆત પહેલા જ અચાનક બદલાયેલા હવામાનને કારણે ખેડૂતોની મુશ્કેલીઓમાં મોટો વધારો થયો છે. જામનગર જિલ્લા સહિત રાજકોટના જામકંડોરણા પંથકમાં કમોસમી વરસાદ (માવઠું) ખાબકતાં ખેડૂતોમાં ચિંતાનું મોજું ફરી વળ્યું છે. અચાનક આવેલા આ વરસાદને કારણે ખેતરોમાં તૈયાર થઈ રહેલા પાકને વ્યાપક નુકસાન થવાની પૂરેપૂરી ભીતિ સેવાઈ રહી છે, જેનાથી ખેડૂતોની આ વર્ષની મહેનત પર પાણી ફરી વળવાની આશંકા સર્જાઈ છે.

પ્રાપ્ત વિગતો અનુસાર જામનગર જિલ્લાના જામજોધપુર તાલુકાના મોટી ગોપ ગામે તેજ પવન સાથે વરસાદ વરસ્યો હતો. આ ઉપરાંત લાલપુર તાલુકાના ભણગોર ગામમાં પણ અચાનક વાતાવરણમાં પલટો આવ્યો હતો અને ધોધમાર માવઠું વરસ્યું હતું. બીજી તરફ રાજકોટ જિલ્લાના જામકંડોરણા પંથકમાં સતત બીજા દિવસે પણ કમોસમી વરસાદ ચાલુ રહ્યો હતો. તાલુકાના ઉજળા અને બાલાપર ગામોમાં વરસાદી માહોલ સર્જાતા ખેડૂતોની ચિંતા વધુ ઘેરી બની છે.

હાલ રાજ્યના આ વિસ્તારોમાં મગફળી, કપાસ અને મરચી જેવા મહત્વના પાકોની કાપણી તથા લણણીની મોસમ ચાલી રહી છે. આવા સમયે અચાનક વરસેલા વરસાદ અને પવનના કારણે ખેતરોમાં રહેલા પાકને ભારે નુકસાન પહોંચવાની સંભાવના છે. ખેતીપાકની ગુણવત્તા બગડવાની સાથે કુલ ઉત્પાદન પર પણ માઠી અસર પડવાની આશંકા છે. અન્નદાતાઓએ ભારે જહેમત અને ખર્ચ કરીને પાક તૈયાર કર્યો હતો, પરંતુ કુદરતના આ અણધાર્યા મારથી ખેડૂતો આર્થિક સંકટમાં મુકાયા છે.

સ્થાનીય ખેડૂતો અને કૃષિ આગેવાનો દ્વારા સરકાર તથા તંત્ર સમક્ષ માંગ કરવામાં આવી છે કે તાત્કાલિક ધોરણે સર્વે કરીને નુકસાનનો અંદાજ મેળવવામાં આવે અને પ્રભાવિત ખેડૂતોને યોગ્ય આર્થિક સહાય અથવા વળતર ચૂકવવામાં આવે. પ્રશાસન દ્વારા પણ સ્થિતિ પર નજર રાખવામાં આવી રહી છે, પરંતુ કમોસમી વરસાદના આ અનિશ્ચિત માહોલને કારણે ખેડૂતોના ચહેરા પર ચિંતાની રેખાઓ સ્પષ્ટ જોવા મળી રહી છે.