BREAKING NEWS

જૂનાગઢ પરિક્રમા મેળાને લઈ મુસાફરો માટે રેલવેનો નિર્ણય, રાજકોટ અને જૂનાગઢ વચ્ચે 18 થી 26 નવેમ્બર સુધી દોડશે બે જોડી મેળા સ્પેશિયલ ટ્રેનો

  • November 17, 2026 10:05 PM 
Aajkaal Daily (Desh Pardesh Ni Aajkaal)

જૂનાગઢ ખાતે યોજાનારા પ્રસિદ્ધ ગિરનાર પરિક્રમા મેળા દરમિયાન લાખો શ્રદ્ધાળુઓ ઉમટી પડતા હોય છે. યાત્રીઓના આ વધારાના ધસારાને ધ્યાનમાં રાખીને પશ્ચિમ રેલવે દ્વારા મુસાફરોની સુવિધા માટે એક અત્યંત મહત્વપૂર્ણ નિર્ણય લેવામાં આવ્યો છે. રેલવે તંત્ર દ્વારા રાજકોટ અને જૂનાગઢ વચ્ચે બે જોડી મેળા સ્પેશિયલ ટ્રેનો દોડાવવાની સત્તાવાર જાહેરાત કરવામાં આવી છે. મુસાફરો સરળતાથી અને કોઈપણ અગવડ વગર મુસાફરી કરી શકે તે માટે આ બંને જોડી મેળા સ્પેશિયલ ટ્રેનો સંપૂર્ણપણે અનરિઝર્વ્ડ રાખવામાં આવી છે. રાજકોટ ડિવિઝનના વરિષ્ઠ મંડળ વાણિજ્ય પ્રબંધક સુનીલ કુમાર મીનાએ વધુમાં વધુ શ્રદ્ધાળુઓ અને મુસાફરોને આ વિશેષ રેલવે સેવાનો લાભ લેવા માટે ખાસ અપીલ કરી છે.


પ્રથમ જોડી અંતર્ગત ટ્રેન સંખ્યા 09604 રાજકોટ-જૂનાગઢ સ્પેશિયલ ટ્રેન રાજકોટથી સવારે 10:25 વાગ્યે ઉપડશે અને બપોરે 13:00 વાગ્યે જૂનાગઢ પહોંચશે. વળતી મુસાફરીમાં ટ્રેન સંખ્યા 09603 જૂનાગઢ-રાજકોટ સ્પેશિયલ ટ્રેન જૂનાગઢથી બપોરે 13:40 વાગ્યે ઉપડીને સાંજે 17:05 વાગ્યે રાજકોટ પરત ફરશે. આ ટ્રેન 18 થી 26 નવેમ્બર 2026 સુધી દરરોજ દોડાવવામાં આવશે, જોકે 20 અને 24 નવેમ્બરના રોજ તેનું સંચાલન બંધ રહેશે.


બીજી જોડી અંતર્ગત ટ્રેન સંખ્યા 09606 રાજકોટ-જૂનાગઢ સ્પેશિયલ ટ્રેન રાજકોટથી રાત્રે 23:30 વાગ્યે રવાના થશે અને બીજા દિવસે મધ્યરાત્રિએ 02:45 વાગ્યે જૂનાગઢ પહોંચશે. પરત ફરતી વખતે ટ્રેન સંખ્યા 09605 જૂનાગઢ-રાજકોટ સ્પેશિયલ ટ્રેન જૂનાગઢથી વહેલી સવારે 04:25 વાગ્યે ઉપડીને સવારે 06:55 વાગ્યે રાજકોટ પહોંચશે. આ ટ્રેન પણ 18 થી 26 નવેમ્બર 2026 દરમિયાન નિયમિત દોડશે, પરંતુ 19 અને 23 નવેમ્બરના રોજ તે દોડશે નહીં.


​​​​​​​મુસાફરોની સગવડતા માટે આ બંને જોડી સ્પેશિયલ ટ્રેનો બંને દિશામાં ભક્તિનગર, ગોંડલ, ગોમટા, વીરપુર, નવાગઢ, જેતલસર અને વડાલ રેલવે સ્ટેશનો પર રોકાશે. પશ્ચિમ રેલવેની આ વિશેષ વ્યવસ્થાથી સૌરાષ્ટ્રભરમાંથી પરિક્રમા કરવા આવતા યાત્રીઓને પરિવહનમાં મોટી રાહત મળશે.



લાઈક અને ફોલો કરો અમારું ફેસબુક પેજ FACEBOOK - AAJKAALDAILY


ફોલો કરો અમારું ઇન્સ્ટાગ્રામ INSTAGRAM - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  99251 12230  

View News On Application