તારી સાથે લગ્ન કરી મારા પૈસા પડી ગયા છે કહીપતિ મારકુત કરતો અને દિયર, નણંદ અને સાસુ ઘરકામ, રસોઈ અને કરિયાવર બાબતે મેણાંટોણાં મારતા ધારી માવતરના ઘરે રિસામણે રહેલી પરિણીતાએ ખાંભાના ભાડ વાંકિયા ગામે રહેતા પતિ કૌશિક રમેશભાઇ સરવૈયા, દિયર સ્મીત સરવૈયા, નણંદ પ્રીયંકાબેન, સાસુ રસીલાબેન સામે ધારી પોલીસ સ્ટેશનમાં ફરિયાદ નોંધાવી છે.

પ્રાપ્ત વિગત મુજબ ધારીના ગોવિદપુર ગામે છેલ્લા એકાદ વર્ષથી માવતરના ઘરે રહેતી ધર્મિષ્ઠાબેન ઉર્ફે ધારાબેન દિનેશભાઇ સરવૈયા (ઉ.વ.27)ની પરિણીતાએ ધારી પોલીસ સ્ટેશનમાં નોંધાવેલી ફરિયાદમાં જણાવ્યું છે કે, મારા લગ્નને એક વર્ષ પહેલા ભાડ વાંકિયા ગામે રહેતા રમેશભાઈ પરમારના પુત્ર કૌશિક સાથે થયા છે. લગ્ન બાદ અમે સયુંકત કુટુંબમાં સાથે રહેતા હતા. 

તારા પિતાને કાંઈ કહીશ તો જાનથી મારી નાખીશ

શરૂઆતમાં મને સારી રીતે રાખી હતી બાદમાં પતિ કહેવા લાગ્યા હતા કે, તારી સાથે લગ્ન કરી મારા પૈસા પડી ગયા છે બોલાચાલી કરી ત્રણ લાફા મારી લીધા હતા. આથી મેં પતિને કહ્યું કે હું મારા પિતાને બધી વાત કરી દઈશ. પતિએ ધમકી આપી હતી કે, તારા પિતાને કાંઈ કહીશ તો જાનથી મારી નાખીસ, દિયર સ્મિતભાઈ કહેતા કે, તારા બાપુજીના ઘરે મજૂરી કામ કરીને આવી છો અને અહીં કાંઈ કામ કરતી નથી. 

થોડા દિવસ પછી પતિને તેડી જવાનું કહ્યું હતું

નણંદ અવાર નવાર રસોઈ બાબતે મેણાંટોણાં મારતા હોય અને સાસુ રમીલાબેન કહેતા કે તું તારા બાપના ઘરેથી કાંઈ કરિયાવર લાવી નથી. પતિને પણ મારા વિરુદ્ધ ચડામણી કરતા હતા આથી મારા પતિ પણ કહેતા કે તારા બાપુજીના ઘરે જવું હોય તો જતી રહે. મારે જોતી નથી કહી ગાળો આપતા હતા. આ રીતે મને શારીરિક અને માનસિક ત્રાસ આપતા મેં મારા ઘરે વાત કરી હતી આથી મારો ભાઈ મને તેડી ગયો હતો. થોડા દિવસ પછી પતિને તેડી જવાનું કહ્યું હતું. પરંતુ આજસુધી તેડવા ના આવતા અંતે ફરિયાદ નોંધાવી છે. પોલીસે પરિણીતાની ફરિયાદના આધારે પતિ સહિતના સાસરિયા સામે ગુનો નોંધી આગળની તપાસ હાથ ધરી છે.