છત્તીસગઢ હાઈકોર્ટે મહિલા અંગે એક મહત્વપૂર્ણ નિર્ણય આપ્યો છે. કોર્ટે કહ્યું છે કે કોઈપણ મહિલાને વર્જિનિટી ટેસ્ટ કરાવવા માટે દબાણ કરી શકાતું નથી. આમ કરવું એ બંધારણની કલમ 21નું ઉલ્લંઘન છે. આ નિર્ણય જસ્ટિસ અરવિંદ કુમાર વર્માએ એક વ્યક્તિની અરજી પર સુનાવણી કરતી વખતે આપ્યો છે.

તે વ્યક્તિએ તેની પત્નીનો વર્જિનિટી ટેસ્ટ કરાવવાની માંગણી કરી હતી. તે સાબિત કરવા માંગતો હતો કે તેની પત્નીનું કોઈ બીજા સાથે અફેર હતું.

કોર્ટે કહ્યું કે કૌમાર્ય પરીક્ષણની મંજૂરી આપવી એ મહિલાના મૂળભૂત અધિકારો, કુદરતી ન્યાયના સિદ્ધાંતો અને તેના વ્યક્તિગત ગૌરવની વિરુદ્ધ હશે. ન્યાયાધીશ અરવિંદ કુમાર વર્માએ વ્યક્તિ દ્વારા દાખલ કરાયેલી ફોજદારી અરજીના જવાબમાં આ ટિપ્પણી કરી હતી.

આ વ્યક્તિએ 15 ઓક્ટોબર, 2024 ના રોજ ફેમિલી કોર્ટના આદેશને પડકાર્યો હતો, જેમાં તેની અરજી ફગાવી દેવામાં આવી હતી. પત્નીએ આરોપ લગાવ્યો હતો કે તેનો પતિ નપુંસક હતો અને તેણે તેની સાથે શારીરિક સંબંધ બાંધવાનો ઇનકાર કર્યો હતો. કોર્ટે તે વ્યક્તિને કહ્યું કે તે પોતાની નપુંસકતાના આરોપને ખોટો સાબિત કરવા માટે તબીબી પરીક્ષણ કરાવી શકે છે.

હાઈકોર્ટે કહ્યું કે જો અરજદાર નપુંસકતાના આરોપો પાયાવિહોણા સાબિત કરવા માંગે છે, તો તે સંબંધિત તબીબી પરીક્ષણો કરાવી શકે છે અથવા અન્ય કોઈ પુરાવા રજૂ કરી શકે છે.9 જાન્યુઆરીના રોજ પસાર થયેલા અને તાજેતરમાં ઉપલબ્ધ કરાયેલા હાઇકોર્ટના આદેશમાં કહેવામાં આવ્યું છે કે, તેમને તેમની પત્નીની કૌમાર્ય પરીક્ષણ કરાવવાની અને તેમના પુરાવામાં રહેલી ખામીઓ ભરવાની મંજૂરી આપી શકાતી નથી.

આ દંપતીએ વર્ષ 2023માં લગ્ન કર્યા હતા. પત્નીએ તેના પરિવારના સભ્યોને કહ્યું હતું કે તેનો પતિ નપુંસક છે, અને તેણે વૈવાહિક સંબંધો બાંધવાનો ઇનકાર કર્યો હતો. તેણીએ તેના પતિ પાસેથી રૂપિયા 20,000 ભરણપોષણની માંગ કરી. અરજદારે જવાબ આપ્યો, પછી તેની પત્નીના કૌમાર્ય પરીક્ષણની માંગ કરી અને આરોપ લગાવ્યો હતો કે તેણી તેના સાળા સાથે ગેરકાયદેસર સંબંધમાં છે.