બનાવની જાણવા મળતી વિગતો મુજબ, આજીડેમ ચોકડી પાસે કનૈયા હોટલ પાન પાછળ રહેતો અશ્વિન ભનુભાઈ ગઢાતરા (ઉ.વ. 25) નામનો કોળી યુવાન ગઈકાલ રાત્રિના 8:30 વાગ્યા આસપાસ આજીડેમ ચોકડી નજીક મુરલીધર કરિયાણાની દુકાન પાસે શેરીમાં મોબાઇલ ફોનમાં તેના ભાઈ સાથે વાત કરતો હતો. દરમિયાન તે ગાળાગાળી કરતો હોય ત્યારે અહીં કરિયાણાની દુકાન પાસે એક મહિલા ઉભી હોય તેને એવી ગેરસમજ થઈ હતી કે અશ્વિન તેને ગાળો આપી રહ્યો છે. જેથી તેણે પોતાના પતિ સિકંદરને આ વાત કરી હતી.

બાદમાં સિકંદરે અહીં આવી યુવાનને ગાળો કેમ બોલે છે? તેમ કહ્યું હતું જેથી યુવાને કહ્યું હતું કે, હું ફોનમાં મારા ભાઈ સાથે વાત કરું છું તમારી પત્નીને મેં કંઈ કહ્યું નથી. પરંતુ તેમ છતાં સિકંદરે યુવાન સાથે ઝઘડો કરી નેફામાંથી છરી કાઢી યુવકને પેટનાભાગે છરીનો ઘા ઝીંકી દીધો હતો. જેથી ઇજાગ્રસ્ત યુવાનને સારવાર માટે સરકારી હોસ્પિટલ ખસેડવામાં આવ્યો હતો. જ્યાં હોસ્પિટલ ચોકીના સ્ટાફે જરૂરી કાર્યવાહી કરી આજીડેમ પોલીસને જાણ કરી હતી. યુવાન કારખાનામાં મજૂરીકામ કરતો હોવાનું અને ત્રણ ભાઈ ત્રણ બહેનના પરિવારમાં નાનો હોવાનું જાણવા મળ્યું છે.