ખંભાળીયા​​​​​​​ : હાલારમાં દુષ્કાળના ડાકલા: કલ્યાણપુરમાં માલધારીઓની હીજરત શરૂ 

ઇસુદાન ગઢવીએ સરકારના વલણ સામે આક્રોશ વ્યક્ત કરતા જણાવ્યું હતું કે મહારાષ્ટ્રની ભાજપ સરકાર પોતાના રાજ્યને દુષ્કાળગ્રસ્ત જાહેર કરી શકતી હોય તો ગુજરાત સરકાર આ નિર્ણય લેવામાં કેમ પાછળ પડી રહી છે. તેમણે ભારપૂર્વક કહ્યું કે ખેડૂતો સરકાર પાસે કોઈ વિશેષ મિલકત કે મોંઘી ગાડીઓની માંગણી નથી કરી રહ્યા, પરંતુ પ્રજાના પોતાના ટેક્સના નાણાંમાંથી પાક નુકસાની, બિયારણના નુકસાન, ઘાસચારા અને સિંચાઈ માટે રાહત સહાયની યોગ્ય રકમ ખેડૂતોના ખાતામાં જમા કરાવવાની માંગ કરી રહ્યા છે.

આ ઉપરાંત, તેમણે સરકારની નીતિઓ સામે સવાલ ઉઠાવતા કહ્યું કે એક તરફ ઉદ્યોગપતિઓને પ્રતીક ભાવે જમીનો આપી દેવામાં આવે છે, જ્યારે બીજી તરફ સંકટ સમયે ખેડૂતોને સહાય આપતી વખતે સરકાર માત્ર આશ્ર્વાસનો આપે છે. તેમણે ઉમેર્યું હતું કે વિપક્ષને કોઈ ક્રેડિટ જોઈતી નથી, બધી ક્રેડિટ સરકાર લઈ લે પરંતુ ત્વરિત ધોરણે મદદ પહોંચાડે. અંતમાં તેમણે ચેતવણી આપતા જણાવ્યું કે જો સરકાર ખેડૂતો અને પશુપાલકોને ન્યાય ન આપી શકતી હોય તો તેને સત્તા પર રહેવાનો કોઈ અધિકાર નથી અને તુરંત રાજીનામું આપી દેવું જોઈએ.