વિકાસકામો તાકીદે પૂર્ણ કરવા તેમજ નવા કામો અંગે જરૂરી આયોજન હાથ ધરવા કેબિનેટમંત્રીએ સૂચનો આપ્યા

પ્રવાસન, સાંસ્કૃતિક પ્રવૃત્તિઓ, વન અને પર્યાવરણ અને કલાઈમેટ ચેન્જ વિભાગના કેબિનેટ મંત્રી મુળુભાઇ બેરાના અઘ્યક્ષ સ્થાને મામલતદાર કચેરી ભાણવડ ખાતે ભાણવડ નગરપાલિકાના વિકાસ કાર્યોની સમીક્ષા બેઠક યોજાઇ હતી. બેઠકમાં પીવાના પાણીની વિતરણ વ્યવસ્થા સુદ્રઢ બનાવવા, પાણીનો વ્યય થતો અટકાવવા, નલ સે જલ યોજનાની કામગીરી, રસ્તા, સ્ટ્રીટ લાઈટ, ભૂગર્ભ ગટર, રસ્તાઓનું પેચવર્ક, સ્વચ્છતા, ડોર ટુ ડોર ગાર્બેજ કલેક્શન સહિતની કામગીરી અંગે વિસ્તૃત ચર્ચા કરવામાં આવી હતી.

તમામ પ્રગતિ હેઠળના કામો ત્વરિત પૂર્ણ કરવા તેમજ નવા કામો અંગે જરૂરી આયોજન કરવા કેબિનેટ મંત્રી મુળુભાઇ બેરાએ વહીવટી તંત્રને સૂચનો કર્યા હતાં. આ બેઠકમાં ભાણવડ નગરપાલિકાના વહીવટદાર અને મામલતદાર એ.પી.ચાવડા, ઈ.ચા.ચીફ ઓફિસર રાહુલ કરમુર, તાલુકા વિકાસ અધિકારી એન. એમ. બૈડીયાવદરા, અગ્રણી ગોવિંદભાઈ કનારા, ચેતનભાઈ રાઠોડ, અજય કારાવદરા સહિત નગરપાલિકાના પૂર્વ પદાધિકારીઓ, સંગઠનના હોદ્દેદારો ઉપસ્થિત રહ્યા હતાં.