રાજસ્થાનથી દ્વારકા આવી રહેલા પ્રવાસીઓને નડયો અકસ્માત : કાર અને ટ્રેકટર ધડાકાભેર અથડાયા : પાંચ ઇજાગ્રસ્તોને ખંભાળીયા સારવારમાં ખસેડાયા

રાજસ્થાનથી કારમાં દ્વારકા આવી રહેલા પ્રવાસીઓને ભાટીયા નજીક અકસ્માત નડયો હતો જેમાં બેના મૃત્યુ થયા છે અને પાંચને ઇજા થતા ખંભાળીયાની હોસ્પીટલમાં સારવાર માટે ખસેડવામાં આવ્યા છે. બનાવની જાણ થતા આજુબાજુના લોકો મદદ માટે દોડી આવ્યા હતા અને પોલીસ ટુકડી રવાના થઇ હતી.

નવા વર્ષના પ્રથમ દિવસે હાલારનો હાઇવે રકતરંજીત બન્યો છે, આજે સવારે ખંભાળીયા-દ્વારકા નેશનલ હાઇવે પર ભાટીયા નજીક ઇનોવા કાર અને ટ્રેકટર વચ્ચે ધડાકાભેર અકસ્માત થતા કાર પડીકુ વળી ગઇ હતી તેમા બેઠેલ રાધારાણીબેન (ઉ.વ.54) નામના મહિલા અને દિવ્યા (ઉ.વ.28) નામની યુવતિ આ બંનેના ઘટના સ્થળે કણ મોત નિપજયા હતા, બંને મૃતદેહને પીએમ અર્થે ખંભાળીયા લઇ જવામાં આવ્યા હતા.

આ અકસ્માતમાં પાંચ વ્યકિતને ઇજા થયાનું જાણવા મળ્યું છે, ઇજાગ્રસ્તોને સારવાર અર્થે ખંભાળીયાની જનરલ હોસ્પીટલમાં ખસેડવામાં આવ્યા છે, રાજસ્થાનનો પરિવાર કારમાં બેસીને દ્વારકા દર્શનાર્થે આવી રહયો હતો ત્યારે વહેલી સવારે ભાટીયા પાસે ગોઝારો અકસ્માત સર્જાયો હતો ઇનોવા કાર ટ્રોલી સાથે ટકરાતા આ અકસ્માત થયાનું જાણવા મળ્યું છે.