ઇન્ડોનેશિયાના ફ્લોરેસ દ્વીપ નજીક શનિવારે સવારે 7.7ની તીવ્રતાનો શક્તિશાળી ભૂકંપ આવ્યો હતો. અમેરિકન જિયોલોજિકલ સર્વે (USGS) અનુસાર, ભૂકંપનું કેન્દ્ર ફ્લોરેસ દ્વીપના ઉત્તરી કિનારાથી આશરે 68 કિલોમીટર ઉત્તર-પશ્ચિમમાં એન્ડે શહેર નજીક હતું. ભૂકંપની ઊંડાઈ માત્ર 10 કિલોમીટર હોવાથી તેના જોરદાર આંચકા આસપાસના વિસ્તારોમાં અનુભવાયા હતા.
પ્રાથમિક ભૂકંપ બાદ આ જ વિસ્તારમાં અનેક આફ્ટરશોક આવ્યા હતા. તેમાં 5.6 અને 5.9ની તીવ્રતાના બે આંચકાઓ ઉપરાંત એક આફ્ટરશોકની તીવ્રતા 6.1 નોંધાઈ હતી. સતત આવતા આંચકાઓને કારણે લોકોમાં ભારે ગભરાટ ફેલાયો હતો અને અનેક લોકો ઘરની બહાર દોડી આવ્યા હતા.

ભૂકંપમાં અત્યાર સુધીમાં 20 લોકોનાં મોતની પુષ્ટિ થઈ હોવાની માહિતી સામે આવી છે. એન્ડે વિસ્તારમાં આવેલા એક હોસ્પિટલના ગ્રાહક સેવા અધિકારી લુકાસ લોટારે જણાવ્યું કે ભૂકંપના અચાનક આવેલા જોરદાર આંચકાથી તેઓ ગભરાઈ ગયા હતા. હોસ્પિટલમાં સારવાર લઈ રહેલા કેટલાક દર્દીઓ પણ ભયના કારણે બહાર દોડી ગયા હતા.
તેમણે જણાવ્યું કે ભૂકંપના આંચકા ખૂબ જ શક્તિશાળી હતા અને હોસ્પિટલની કેટલીક દિવાલોમાં તિરાડો પડી ગઈ હતી. ભૂકંપ બાદ સ્થાનિક તંત્ર દ્વારા નુકસાનનું આકલન અને બચાવ કામગીરી હાથ ધરવામાં આવી રહી છે.

ઇન્ડોનેશિયાની હવામાનશાસ્ત્ર, જલવાયુશાસ્ત્ર અને ભૂભૌતિકશાસ્ત્ર એજન્સી (BMKG)એ ભૂકંપ બાદ સુનામીની શક્યતાને લઈને ચેતવણી જાહેર કરી હતી. સમુદ્રની નજીક આવેલા વિસ્તારોમાં લોકોને સાવચેતી રાખવા અને સત્તાવાળાઓની સૂચનાઓનું પાલન કરવા જણાવવામાં આવ્યું છે. ભૂકંપની ઓછી ઊંડાઈને કારણે તેના કારણે સમુદ્રમાં હલચલ થવાની અને સુનામીની લહેરો ઊભી થવાની સંભાવનાને લઈને તંત્ર સતર્ક બન્યું છે. ભૂકંપ બાદ પરિસ્થિતિ પર સતત નજર રાખવામાં આવી રહી છે.

ઇન્ડોનેશિયા વિશ્વના સૌથી વધુ ભૂકંપપ્રવણ દેશોમાંનો એક છે. ઇન્ડોનેશિયા અને તેના આસપાસના દેશો પ્રશાંત મહાસાગરના ‘રિંગ ઓફ ફાયર’ વિસ્તારમાં આવેલા છે. આ વિસ્તાર જાપાનથી દક્ષિણ-પૂર્વ એશિયા થઈને પ્રશાંત મહાસાગરના બેસિન સુધી ફેલાયેલો છે અને અહીં ભૂગર્ભીય પ્લેટોની હિલચાલને કારણે વારંવાર ભૂકંપ અને જ્વાળામુખી વિસ્ફોટ જેવી કુદરતી ઘટનાઓ સર્જાય છે.

હાલ સ્થાનિક તંત્ર દ્વારા અસરગ્રસ્ત વિસ્તારોમાં નુકસાન અને જાનહાનિ અંગે વધુ માહિતી એકત્ર કરવામાં આવી રહી છે. સતત આફ્ટરશોકની શક્યતાને ધ્યાનમાં રાખીને બચાવ અને રાહત ટીમોને પણ સતર્ક રાખવામાં આવી છે.