ગોંડલમાં આવેલી એક હાઇસ્કૂલના વાલીઓના ગ્રુપમાં કોઇ શખસે બીભત્સ ફોટાઓ અપલોડ કરી દેતા ભારે ઉહાપોહ મચી ગયો હતો. વાલીઓએ શાળાનું ધ્યાન દોર્યા બાદ પોલીસ ફરિયાદ કરવામાં આવી હતી. ગોંડલ સિટી પોલીસે તપાસ કરી આ ફોટો મૂકનાર સુરેન્દ્રનગરના શખસને ઝડપી લીધો હતો. આ શખસ વાલી તરીકે જ ગ્રુપમાં જોડાયો હતો. અજાણતા તેણે ફોટા શેર કરી દીધા હોવાનું રટણ કર્યું હતું.

9904833303 નંબર પરથી બિભત્સ ફોટા અપલોડ કરવામાં આવ્યા હતા

ગોંડલની શાળામાં સ્ટુડન્ટ પોલીસ કેડેટની પ્રવૃત્તિ અંતર્ગત ધોરણ 9ની વિદ્યાર્થીનીઓના વાલીઓ માટે વોટ્સએપ ગ્રુપ બનાવવામાં આવ્યું હતું. 30 મે, 2024ના રોજ આ ગ્રુપમાં 9904833303 નંબર પરથી બિભત્સ ફોટા અપલોડ કરવામાં આવ્યા હતા. આ મામલે ગોંડલ સિટી પોલીસ સ્ટેશનમાં બીએનએસની કલમ 294(2)એ અને આઇટી એક્ટની કલમ-67 હેઠળ ફરિયાદ નોંધાઈ હતી.

તપાસ શરૂ કરવામાં આવી હતી

બનાવને લઇ ડીવાયએસપી કે.જી. ઝાલાના માર્ગદર્શન હેઠળ તપાસ શરૂ કરવામાં આવી હતી. ગોંડલ સિટી પોલીસ સ્ટેશનના પીઆઇ એલ.આર. ગોહિલ તથા ટીમે આ અંગે તપાસ હાથ ધરી ગ્રુપમાં બીભત્સ ફોટો મુકનાર સમીર કાદરભાઇ આરબ(ઉ.વ ૩૭ રહે. કૃષ્ણનગર બાપાસીતારામ મઢુલી પાસે સુરેન્દ્રનગર) ને ઝડપી લીધો હતો.

ભૂલથી ટચ થતાં ફોટા અજાણતાં શેર થઈ ગયા હતા

પોલીસે જણાવ્યું હતું કે, આરોપી વાલી તરીકે ગ્રુપમાં જોડાયેલા હતો તેણે પૂછપરછમાં કહ્યું કે મોબાઈલમાં કોઈ એપ્લિકેશન પર ભૂલથી ટચ થતાં ફોટા અજાણતાં શેર થઈ ગયા હતા. ફોટો મૂકનાર આ શખસને શોધી કાઢવાની કામગીરીમાં પીઆઇની રાહબરી હેઠળ પીએસઆઇ વી.જે. જાડેજા, હેડ.કોન્સ. યુવરાજસિંહ ગોહિલ, મહાવીરભાઇ બોરીચા, સુનીલભાઇ મકવાણા તથા પો.કોન્સ. ભાવેશભાઇ સાસીયા, હરેશભાઇ લુણી, અને જયસુખભાઇ સોરીયા સહિતના સાથે રહ્યા હતાં.