શાપરમાં ઘર પાસે રમતા ત્રણ વર્ષના બાળકને સ્કૂલ બસે અડફેટે લેતા ગંભીર ઇજા થવાથી કરુણ મોત નીપજ્યું હતું. બાળક અન્ય બાળકો સાથે રમતો હતો ત્યારે પુરપાટ ઝડપે આવેલા બસ ચાલકે ઠોકરે લેતા બનાવ બન્યો હતો. ઘટનાના પગલે લોકોના ટોળા એકઠા થઈ ગયા હતા અને પોલીસને જાણ કરવામાં આવતા શાપર પોલીસ દોડી જઈ બસને પોલીસ સ્ટેશન ખાતે લઈ જઈ કાર્યવાહી હાથ ધરી હતી.

બનાવની પ્રાપ્ત વિગત મુજબ મૂળ એમપીના વતની અને હાલ શાપરમાં ભૂમિ ઇન્ડસ્ટ્રીઝ એરિયામાં રાખી કારખાનામાં મજૂરી કામ કરતા માનસિંહ જાદવનો ત્રણ વર્ષનો પુત્ર મહેન્દ્ર ઘર બહાર અન્ય બાળકો સાથે રમતો હતો ત્યારે પસાર થતી સ્કૂલ બસે બાળકને ઠોકરે લેતા ગંભીર ઇજા થવાથી સિવિલ હોસ્પિટલમાં ખસેડવામાં આવ્યો હતો. જ્યાં સારવાર કારગત નીવડે પૂર્વે દમ તોડી દેતા પરિવારમાં કલ્પાંત સર્જાયો હતો.

મૃતક મહેન્દ્ર બે ભાઈ એક બહેનમાં નાનો હતો. અકસ્માત સર્જનાર સ્કૂલ બસ ચાલક સામે પોલીસે ગુનો નોંધવા તજવીજ હાથ ધરી છે.