જ્યારે કોઈ અકસ્માત એકસાથે અનેક પરિવારોના ઘરના ચિરાગ ઓલવી નાખે છે, ત્યારે સમગ્ર સમાજ સ્તબ્ધ થઈ જાય છે. અમદાવાદમાં બનેલી ફટાકડાની ફેક્ટરીની ભયાનક દુર્ઘટનાએ સૌ કોઈના કાળજા કંપાવી દીધા છે. આ કપરા સમયે પીડિત પરિવારોના આંસુ લૂછવા અને તેમની વહારે આવવા માટે રાજ્યના મુખ્યમંત્રી ભૂપેન્દ્ર પટેલે સંવેદના વ્યક્ત કરી છે અને પીડિતો માટે તાત્કાલિક આર્થિક સહાયની જાહેરાત કરી છે.

​​​​​​​અમદાવાદમાં એક ફટાકડાની ફેક્ટરીમાં સર્જાયેલા ભયાનક બ્લાસ્ટ અને અકસ્માતના સમાચાર મળતા જ મુખ્યમંત્રી ભૂપેન્દ્ર પટેલે સોશિયલ મીડિયા પ્લેટફોર્મ એક્સ (Twitter) પર ટ્વીટ કરીને ઊંડા દુઃખની લાગણી વ્યક્ત કરી છે. મુખ્યમંત્રીએ આ કાળમુખી દુર્ઘટનામાં જીવ ગુમાવનારા નિર્દોષ નાગરિકોના પરિવારો પ્રત્યે સંવેદના પ્રગટ કરી છે, સાથે જ ઈજાગ્રસ્તો ઝડપથી સાજા થાય તેવી પ્રાર્થના કરી રાજ્ય સરકાર તરફથી મોટી આર્થિક મદદ આપવાની સત્તાવાર જાહેરાત કરી છે.

રાજ્ય સરકાર દ્વારા આ આફતનો ભોગ બનેલા પરિવારોને ટેકો આપવા માટે તાત્કાલિક ધોરણે સહાય મંજૂર કરવામાં આવી છે. જે અંતર્ગત દરેક મૃતકના પરિવારને રૂપિયા ૪ લાખ અને તમામ ઈજાગ્રસ્તોને રૂપિયા ૫૦,૦૦૦ ની આર્થિક સહાય સીધી ચૂકવવામાં આવશે.