અમેરિકન ટેક જાયન્ટ એપલે એક મહત્વપૂર્ણ સીમાચિહ્ન હાંસલ કર્યું છે. મંગળવારે, કંપનીનું માર્કેટ કેપ 4 ટ્રિલિયન ડોલર અથવા રૂ. 352 લાખ કરોડ સુધી પહોંચી ગયું. આ આંકડો ભારતના કુલ સ્થાનિક ઉત્પાદન જેટલો છે. વિશ્વ બેંકના પોર્ટલ અનુસાર, ભારતનો જીડીપી આશરે 3.91 ટ્રિલિયન ડોલર છે.

કાઉન્ટરપોઇન્ટ રિસર્ચના ડેટા અનુસાર, યુએસ અને ચીનમાં આઈફોન 17નું પ્રારંભિક વેચાણ અગાઉના મોડેલ કરતા 14 ટકા વધુ હતું. આઈફોન 17 શ્રેણીને ભારત સહિત વૈશ્વિક સ્તરે સારો પ્રતિસાદ મળ્યો છે.એપલ 4 ટ્રિલિયન ડોલરની માર્કેટ કેપ સુધી પહોંચનારી ત્રીજી કંપની બની છે. અગાઉ, એનવીડિયા અને માઈક્રોસોફ્ટ આ સીમાચિહ્ન પર પહોંચી ચૂક્યા છે.એનવીડિયા 4.71 ટ્રિલિયન ડોલર (રૂ. 415 લાખ કરોડ) ની બજાર કિંમત સાથે વિશ્વની સૌથી મૂલ્યવાન કંપની છે. માઇક્રોસોફ્ટ 4.06 ટ્રિલિયન ડોલર (રૂ. 358 લાખ કરોડ) ની બજાર મૂડી સાથે વિશ્વની બીજી સૌથી મૂલ્યવાન કંપની છે.

એપલના શેર થોડા સમય માટે 269.89 ડોલર પર પહોંચી ગયા, જેના કારણે એપલનું બજાર મૂલ્ય 4.005 ટ્રિલિયન ડોલર થયું. જોકે, દિવસના અંતે, શેર 0.1% ના વધારા સાથે બંધ થયો, જેના કારણે કંપનીનું મૂલ્ય 3.992 ટ્રિલિયન ડોલર થયું.શેરબજારમાં આ ઉછાળો આઈફોન 17 લાઇનઅપ અને આઈફોન એરની લોકપ્રિયતાને કારણે છે. નવા આઈફોન એ તેમના લોન્ચ થયાના થોડા અઠવાડિયામાં જ સનસનાટી મચાવી દીધી, જ્યારે આઈફોન એરને સારો પ્રતિસાદ મળ્યો છે.