નોર્થ સાયપ્રસના દરિયાઈ વિસ્તારમાંથી એક અત્યંત દુઃખદ અને ભયાનક અકસ્માત સામે આવ્યો છે. 260 થી વધુ લોકોને લઈને જઈ રહેલી એક કટમરેન શૈલીની બોટ દરિયામાં અચાનક પલટી ગઈ હતી. આ દર્દનાક દુર્ઘટનામાં ઓછામાં ઓછા 7 લોકોના મોત નીપજ્યા છે, જ્યારે 89 લોકો હજુ પણ ગુમ છે. સીએનએન તુર્ક (CNN Turk) ના અહેવાલ મુજબ, ઉત્તરી સાયપ્રસના વડાપ્રધાન ઉનાલ ઉસ્ટેલે આ ઘટના અંગે સત્તાવાર માહિતી આપતાં જણાવ્યું હતું કે, બચાવ ટુકડીઓ દ્વારા અત્યાર સુધીમાં 172 લોકોને સુરક્ષિત રીતે બચાવી લેવામાં આવ્યા છે.

મળતી વિગતો અનુસાર, આ જહાજ કાયરેનિયા બંદર પરથી ઉપડ્યું હતું અને કિનારાથી માત્ર થોડા કિલોમીટર દૂર પહોંચતા જ તે દરિયામાં ડૂબવા લાગ્યું હતું. વડાપ્રધાન ઉસ્ટેલે સ્પષ્ટ કર્યું કે જ્યારે આ બોટ પલટી ત્યારે તેમાં ક્રૂ મેમ્બર્સ સહિત કુલ 267 લોકો સવાર હતા. તુર્કી સાયપ્રસના પરિવહન મંત્રી એરહાન અરિકલીએ જણાવ્યું હતું કે, અકસ્માત બાદ ઈજાગ્રસ્ત થયેલા લોકોને તાત્કાલિક પોર્ટ પર લાવવા અને ત્યાંથી સ્થાનિક હોસ્પિટલોમાં ખસેડવા માટે વ્યાપક રેસ્ક્યૂ ઓપરેશન ચલાવવામાં આવી રહ્યું છે. તેમણે ઉમેર્યું કે જહાજ ડૂબવાના સાચા કારણો જાણવા માટે તપાસના આદેશ આપવામાં આવ્યા છે.

તુર્કી ટેલિવિઝન પર દર્શાવવામાં આવેલા દ્રશ્યોમાં દરિયાના પાણીમાં ઊંધી પડેલી ફેરી જોવા મળી રહી હતી, જેના નારંગી રંગના તળિયા પર અનેક લોકો લાઈફ જેકેટ પહેરીને મદદની રાહ જોઈ રહ્યા હતા. ઘટના સમયે દરિયાનું હવામાન સુખદ હતું, જેના કારણે આસપાસના વિસ્તારમાં હાજર અન્ય બોટો અને સ્થાનિક લોકો પણ તાત્કાલિક મદદ માટે પહોંચી ગયા હતા. આ અકસ્માતે સમગ્ર વિસ્તારમાં શોકની કાલીમા છવાઈ દીધી છે.

​​​​​​​વડાપ્રધાન ઉસ્ટેલે દુર્ઘટનામાં જીવ ગુમાવનારા લોકોના પરિવારજનો પ્રત્યે ઊંડી સંવેદના વ્યક્ત કરી હતી અને ઈજાગ્રસ્તો ઝડપથી સાજા થાય તેવી પ્રાર્થના કરી હતી. તેમણે કહ્યું કે રાજ્યની તમામ સુરક્ષા અને રાહત એજન્સીઓ બચાવ કામગીરીમાં જોડાયેલી છે અને ગુમ થયેલા 89 લોકોની શોધખોળ અત્યંત સાવચેતીપૂર્વક કરવામાં આવી રહી છે. બીજી તરફ, તુર્કી સાયપ્રસના આરોગ્ય મંત્રાલયે એક નિવેદન જારી કરીને જણાવ્યું છે કે વિસ્તારની તમામ હોસ્પિટલોને હાઇ એલર્ટ પર રાખવામાં આવી છે જેથી કરીને ઈજાગ્રસ્તોને તાત્કાલિક તબીબી સારવાર પૂરી પાડી શકાય.