જ્યારે આકાશમાંથી આફત બનીને મુસળધાર વરસાદ વરસે છે, ત્યારે પૂરના પાણીમાં ફસાયેલા લોકો માટે સરકાર અને સ્થાનિક તંત્રની સક્રિયતા જ આશાનું સૌથી મોટું કિરણ બને છે. ગુજરાતમાં સર્જાયેલી જળબંબાકારની સ્થિતિ વચ્ચે મુખ્યમંત્રી ભૂપેન્દ્ર પટેલે પોતે મોરચો સંભાળી લીધો છે. કંટ્રોલ રૂમની ઓચિંતી મુલાકાત લઈને રાજ્યની પરિસ્થિતિનો તાગ મેળવવો એ દર્શાવે છે કે આફતના આ સમયે તંત્ર નાગરિકોની સુરક્ષા માટે પૂરેપૂરું પ્રતિબદ્ધ છે.

રાજ્યમાં સાર્વત્રિક અને આક્રમક વરસાદથી ઊભી થયેલી પૂર જેવી પરિસ્થિતિ વચ્ચે મુખ્યમંત્રી ભૂપેન્દ્ર પટેલે સ્ટેટ ઈમરજન્સી ઓપરેશન સેન્ટર (SEOC), ગાંધીનગરની ઓચિંતી મુલાકાત લીધી હતી. મુખ્યમંત્રીએ ઉચ્ચ અધિકારીઓ સાથે બેઠક યોજીને વરસાદી સ્થિતિ, રાહત-બચાવ કામગીરી અને જનજીવન પર પડેલી અસરની ઝીણવટભરી સમીક્ષા કરી હતી. ૧૦ જેટલા જિલ્લાઓમાં ભારેથી અતિભારે વરસાદના 'રેડ એલર્ટ'ની સંભાવનાને પગલે તમામ જિલ્લા કલેક્ટરોને ચોવીસે કલાક સતર્ક રહેવા અને એલર્ટ મોડ પર કામ કરવા કડક નિર્દેશ આપવામાં આવ્યા છે.

​​​​​​​પૂરથી વધુ પ્રભાવિત થવાની શક્યતા ધરાવતા અમદાવાદ, નવસારી અને સુરત જિલ્લામાં ભારતીય આર્મીની ૨-૨ કોલમ તૈનાત કરી દેવામાં આવી છે. ઈમરજન્સી રેસ્ક્યૂ ઓપરેશન માટે એરફોર્સના હેલિકોપ્ટર્સ જામનગર, વડોદરા, જોધપુર અને પુણે ખાતે કોઈપણ ક્ષણે ઉડાન ભરવા માટે સજ્જ રાખવામાં આવ્યા છે.

૧૬,૫૦૦ થી વધુ લોકોનું સ્થળાંતર
નીચાણવાળા અને સંવેદનશીલ વિસ્તારોમાંથી અત્યાર સુધીમાં ૧૬,૫૦૦ થી વધુ નાગરિકોને સુરક્ષિત સ્થળે ખસેડવામાં આવ્યા છે, જ્યારે પૂરના પાણીમાં ફસાયેલા ૪૧ લોકોનું સફળતાપૂર્વક રેસ્ક્યૂ કરવામાં આવ્યું છે.