સુરત શહેરમાં દિવાળીના પાવન તહેવારોની ઉજવણી વચ્ચે એક કાળજું કંપાવી દે તેવી અત્યંત ક્રૂર અને સનસનાટીભરી ઘટના સામે આવી છે. કતારગામ વિસ્તારમાં આવેલા ગોટાલા વાડી ચાર રસ્તા નજીકના ખ્રિસ્તી કબ્રસ્તાનમાંથી એક અજાણ્યા પુરુષનું માથા વગરનું અને સંપૂર્ણ નગ્ન ધડ મળી આવતાં સમગ્ર વિસ્તારમાં અફરાતફરી અને ભયનો માહોલ સર્જાયો હતો. મૃતકની ઓળખ છુપાવવાના હેતુથી માથું કાપીને આ હત્યા આચરવામાં આવી હોવાની આશંકા સાથે કતારગામ પોલીસ સહિત ઉચ્ચ પોલીસ અધિકારીઓનો કાફલો તાત્કાલિક ઘટનાસ્થળે પહોંચી ગયો હતો અને મૃતદેહના ધડને પોસ્ટમોર્ટમ અર્થે સ્મિમેર હોસ્પિટલ ખસેડી આગળની સઘન તપાસ હાથ ધરી હતી.

પોલીસ તપાસ દરમિયાન આ ભયાનક હત્યાકાંડ અંગે ચોંકાવનારી વિગતો પ્રકાશમાં આવી છે. કતારગામ પોલીસે ટેકનિકલ અને બાતમીદારોના આધારે મૂળ ઓડિશાના વતની અને હાલ કતારગામની રેલ રાહત કોલોનીમાં રહેતા સચિત્ર કુમાર નરેન્દ્ર બાલ નામના આરોપીની ધરપકડ કરી હતી. કડક પૂછપરછ દરમિયાન આરોપીએ કબૂલાત કરી હતી કે તેણે યુવકની મટન કાપવાના છરાથી ક્રૂરતાપૂર્વક હત્યા કર્યા બાદ તેનું માથું કતારગામ અલ્કાપુરી બ્રિજ નીચે રેલવે પટરી નજીક ફેંકી દીધું હતું. પોલીસે આરોપીને સાથે રાખીને પંચનામું કરી ધડથી આશરે ૩ કિમી દૂરથી મૃતકનું કપાયેલું માથું કબજે કર્યું હતું અને તેને ડી.એન.એ. તથા કાનૂની કાર્યવાહી અર્થે હોસ્પિટલ મોકલી આપ્યું હતું.

પોલીસની પ્રાથમિક તપાસમાં મૃતક યુવકની ઓળખ ૩૦ વર્ષીય સંજય તરીકે થઈ છે, જે સુરતના અમરોલી વિસ્તારમાં રહેતો હતો અને મૂળ ઓડિશાનો વતની હતો. મૃતક સંજય અને આરોપી સચિત્ર કુમાર બંને કતારગામ GIDCમાં આવેલા એક લૂમ્સના કારખાનામાં સાથે કામ કરતા હતા. પોલીસ ચોપડે ખુલેલી વિગતો મુજબ, બંને વચ્ચે માત્ર ₹૩૦ હજારની લેતીદેતી અંગે ગંભીર વિવાદ ચાલી રહ્યો હતો. આ આર્થિક બાબતના ઝઘડાનું ઉગ્ર સ્વરૂપ ધારણ કરી લેતાં આરોપીએ સંજયની આટલી ઘાતકી અને નિર્મમ રીતે હત્યા કરી નાખી હતી.

ઘટનાની વિગતવાર માહિતી મુજબ, ૩ નવેમ્બરની રાત્રે કતારગામ પોલીસ કંટ્રોલ રૂમ ખાતે એક મેસેજ મળ્યો હતો કે ગોટાલાવાડી ચાર રસ્તા પાસે આવેલા ખ્રિસ્તી કબ્રસ્તાનમાં એક નિશ્ચેત મૃતદેહ પડ્યો છે. માહિતી મળતાં જ પોલીસ ટીમ તાબડતોબ સ્થળ પર દોડી ગઈ હતી. ઘટનાસ્થળે પહોંચેલી પોલીસ પણ આ દ્રશ્ય જોઈને ચોંકી ઉઠી હતી, કારણ કે કબ્રસ્તાનમાં પડેલા મૃતદેહનું માથું ગાયબ હતું અને શરીર પર એક પણ કપડું નહોતું. હાલ કતારગામ પોલીસે આરોપી સામે હત્યાનો ગુનો નોંધીને ઘટના પાછળના અન્ય કોઈ કારણો કે મદદગારો છે કે કેમ તે દિશામાં સઘન પૂછપરછ અને તપાસ ચાલુ રાખી છે.