ડ્રગ્સ સબંધે સુરક્ષા એજન્સીની સધન તપાસ : પેણ બંદર નજીક એસઓજીની ટુકડીએ 987 ગ્રામ ચરસ જપ્ત કર્યુ : હાલારમાં ડ્રગ્સ મળવાનો સિલસિલો યથાવત

ગત વર્ષોમાં દ્વારકા પંથકમાંથી ડ્રગ્સનો જથ્થો મળી આવ્યો હતો અને એ પછી જામનગર તથા અન્ય વિસ્તારોમાં પણ પોલીસ અને સુરક્ષા એજન્સીઓએ ડ્રગ્સ પકડી પાડયુ હતું, દરમ્યાનમાં દ્વારકાના પેણ બંદરના દરીયા કાંઠેથી ચરસનો જંગી જથ્થો બિનવારસુ મળી આવતા કબ્જે કરીને આ દીશામાં જુદી જુદી સુરક્ષા એજન્સીઓએ તપાસમાં ઝંપલાવ્યું છે. બિનવારસુ 44.85 લાખનો જથ્થો સાંપડતા ભારે ચકચાર મચી જવા પામી છે.

દ્વારકા જીલ્લામાં ફરી એક વખત લાખોની કિંમતનું ડ્રગ્સ ઝડપાયું છે અને આ ડ્રગ્સ અહીં કોણ લાવ્યું એ સહિતના અંકોડા મેળવવા માટે તપાસ ચલાવવામાં આવી રહી છે, હાલ આ મુદે વધુ વિગતો સામે આવી નથી.

જાણવા મળ્યા મુજબ દ્વારકાના પેણ બંદરની આસપાસના દરીયા કાંઠેથી 987 ગ્રામ ચરસ જેની અંદાજે કિ. ા. 44.85 લાખ થવા જાય છે, આ બિનવારસુ ચરસ એસઓજીની ટુકડીએ કબ્જે કર્યુ હતું, એવી પણ વિગત જાણવા મળી છે કે દ્વારકાના વરવાળા પાસે આવેલ હોટલ સ્કાય કમ્ફર્ટ બીચની સામેના દરીયા કાંઠેથી આ ચરસ મળી આવ્યુ હતું. મુદામાલ કબ્જે કરીને ડ્રગ્સ સબંધે સુરક્ષા એજન્સીઓએ તપાસમાં ઝંપલાવ્યું છે.

વધુ એક વખત દ્વારકા પંથકમાં ચરસના બોકસ મળી આવતા ભારે ચકચાર મચી ગઇ છે, ગત વર્ષોમાં હેરોઇન સહિતનો ડ્રગ્સનો જથ્થો દ્વારકા પંથકમાંથી ઝડપાયો હતો એ પછી જામનગરમાં પણ ડ્રગ્સ મળી આવ્યુ હતું અને તપાસ એજન્સીઓ વધુ સતર્ક બની હતી, દરમ્યાન ચરસ મામલે હાલ અલગ અલગ ટુકડીઓને કામે લગાડવામાં આવી છે.