કેરળ વિધાનસભા ચૂંટણીના પરિણામોમાં રાજકીય પલટો જોવા મળી રહ્યો છે. 140 બેઠકો માટે થયેલા મતદાન બાદ કોંગ્રેસના નેતૃત્વ હેઠળના યુનાઇટેડ ડેમોક્રેટિક ફ્રન્ટ ગઠબંધનને સ્પષ્ટ બહુમતી મળતી દેખાઈ રહી છે. તાજા આંકડા મુજબ યુડીએફ 98 બેઠકો પર આગળ છે, જ્યારે સત્તાધારી લેફ્ટ ડેમોક્રેટિક ફ્રન્ટ માત્ર 43 બેઠકો સુધી સીમિત રહેતું જણાઈ રહ્યું છે. બીજી તરફ ભારતીય જનતા પાર્ટીનું ગઠબંધન 1 બેઠક પર આગળ છે અને અન્ય ઉમેદવારો 2 બેઠકો પર આગળ ચાલી રહ્યા છે.કેરળમાં 9 એપ્રિલે એક જ તબક્કામાં મતદાન યોજાયું હતું, જેમાં 78.27 ટકા મતદાન નોંધાયું હતું. આ વખતે સત્તા જાળવી રાખવા માટે મુખ્યમંત્રી પિનરાયી વિજયન સતત ત્રીજી વખત સરકાર બનાવવાનો પ્રયાસ કરી રહ્યા હતા. 

તેમ છતાં, વર્તમાન વલણો દર્શાવે છે કે મતદારોમાં પરિવર્તનની લહેર જોવા મળી રહી છે અને કોંગ્રેસના નેતૃત્વ હેઠળનું યુડીએફ ગઠબંધન સરકાર રચવાની દિશામાં આગળ વધી રહ્યું છે.રાજકીય વિશ્લેષકો માને છે કે આ પરિણામો રાજ્યમાં શાસન પ્રત્યેના અસંતોષ અને સ્થાનિક મુદ્દાઓના પ્રભાવને દર્શાવે છે. યુડીએફે પોતાના પ્રચારમાં બેરોજગારી, મોંઘવારી અને વિકાસના મુદ્દાઓને પ્રાથમિકતા આપી હતી, જે મતદારોમાં અસરકારક સાબિત થઈ હોવાનું લાગી રહ્યું છે. બીજી તરફ એલડીએફએ પોતાના વિકાસકાર્યો અને કલ્યાણકારી યોજનાઓનો ઉલ્લેખ કર્યો હતો, છતાં તે પૂરતું સાબિત થયું નથી. આ સાથે જ કેન્દ્રશાસિત પ્રદેશ પુડુચેરીમાં પણ 30 વિધાનસભા બેઠકો માટે 9 એપ્રિલે મતદાન યોજાયું હતું. અહીં નોંધપાત્ર 89.97 ટકા મતદાન નોંધાયું, જે મતદારોની ઊંચી ભાગીદારી દર્શાવે છે. પુડુચેરીના પરિણામો પણ ટૂંક સમયમાં સ્પષ્ટ થશે અને તે પ્રદેશની રાજકીય દિશા નક્કી કરશે.