રાજકોટ જિલ્લાના ધોરાજીમાં રૂઢિચુસ્તતા, અંધશ્રદ્ધા અને લાલચની પરાકાષ્ઠા સમાન એક અત્યંત શરમજનક ઘટના સામે આવી છે. અહીં એક કમનસીબ પુત્રવધૂ સોનલના પતિના અવસાનના માત્ર ત્રીજા જ દિવસે, તેના સાસુ-સસરા અને નણંદે ભેગા મળીને તેનું બળજબરીથી મુંડન કરાવી નાખ્યું હતું. પતિના મોતના આઘાતમાં ડૂબેલી યુવતી પર આ પ્રકારનો અત્યાચાર ગુજારવામાં આવતા સમગ્ર પંથકમાં ભારે અરેરાટી અને રોષની લાગણી વ્યાપી ગઈ છે.

પતિની આત્માની શાંતિના બહાને મિલકત હડપવાનો ખેલ

પ્રાપ્ત વિગતો અનુસાર, આ ક્રૂર કૃત્ય પાછળ ધાર્મિક પરંપરા નહીં પરંતુ મિલકત મેળવવાનો આંધળો સ્વાર્થ જવાબદાર હતો. સોનલના પતિના અવસાન બાદ મિલકત પોતાના નામે કરાવી લેવાના હેતુથી સાસુ, સસરા અને નણંદે એક કાવતરું ઘડ્યું હતું. તેમણે સોનલને ડરાવી-ધમકાવીને એવું ઠસાવ્યું કે જો તે મુંડન નહીં કરાવે તો તેના પતિના આત્માને શાંતિ નહીં મળે. અંધશ્રદ્ધાનો સહારો લઈને આ નરાધમોએ સોનલની ઈચ્છા વિરુદ્ધ તેનું માથું મુંડાવી દીધું હતું, જેથી તેણી સમાજમાં નબળી પડે અને મિલકત પરથી પોતાનો હક છોડી દે.

મહિલા પોલીસ સ્ટેશનમાં ફરિયાદ અને વિજ્ઞાન જાથા સમક્ષ લેખિત માફી

આ અમાનવીય વર્તન સામે હિંમત બતાવીને પીડિત સોનલે રાજકોટ મહિલા પોલીસ સ્ટેશનમાં સાસરીયાઓ વિરુદ્ધ કાયદેસરની ફરિયાદ નોંધાવી હતી. આ ઘટનાની ગંભીરતાને જોતાં 'ભારત જન વિજ્ઞાન જાથા'ની ટીમ પણ તાત્કાલિક તપાસમાં જોડાઈ હતી. વિજ્ઞાન જાથાની સઘન પૂછપરછ અને કાઉન્સિલિંગ દરમિયાન સાસરીયાઓનો અંધશ્રદ્ધાનો મહોરો ઉતરી ગયો હતો અને મિલકતનો વિવાદ જ મુખ્ય કારણ હોવાનું સાબિત થયું હતું. કાયદાકીય સકંજામાં ફસાતા જ આરોપી સાસુ-સસરા અને નણંદે વિજ્ઞાન જાથાની ટીમ સમક્ષ પોતાની મોટી ભૂલ સ્વીકારી લીધી હતી. તેમણે સોનલની લેખિતમાં માફી માંગી હતી અને ભવિષ્યમાં તેની સાથે આવું કોઈ કૃત્ય કે હેરાનગતિ નહીં કરવાની ખાતરી આપી હતી.

​​​​​​​

View this post on Instagram

A post shared by Aajkaal (@aajkaaldaily)