હવાઈ મુસાફરી માટે લોકો મોંઘી ટિકિટો એટલે ખરીદતા હોય છે કે તેમનો સમય બચે અને મુસાફરી આરામદાયક રહે. પરંતુ, જ્યારે એરપોર્ટ પર કલાકો સુધી રાહ જોવી પડે અને પ્લેનની અંદર પેસેન્જરોને ગૂંગળામણનો સામનો કરવો પડે, ત્યારે મુસાફરોનો પિત્તો જાય તે સ્વાભાવિક છે. દિલ્હી એરપોર્ટ પર આજે એર ઇન્ડિયાની ફ્લાઇટમાં કંઈક આવો જ નજારો જોવા મળ્યો, જ્યાં સુવિધાઓના અભાવે મુસાફરોનો આક્રોશ ફાટી નીકળ્યો હતો.

એર ઇન્ડિયાની દિલ્હીથી રાજકોટ આવી રહેલી ફ્લાઇટમાં આજે ભારે ટેકનિકલ ખામી સર્જાતાં મુસાફરોને ભારે હાલાકી ભોગવવી પડી હતી. પ્લેનની અંદર એર કંડિશનર (AC) બંધ થઈ જવાને કારણે ગૂંગળામણ અનુભવતા હવાઈ મુસાફરોએ દિલ્હી એરપોર્ટ પર જ જોરદાર હોબાળો મચાવ્યો હતો. આ ઘટનાના કેટલાક વીડિયો પણ સોશિયલ મીડિયા પર વાયરલ થયા છે, જેમાં મુસાફરો એરલાઇન્સના સ્ટાફ અને ક્રૂ મેમ્બર્સ સામે પોતાનો રોષ ઠાલવતા નજરે પડે છે.

AC બંધ, છતાં કેપ્ટને ઉડાન ભરવાની તૈયારી કરી
વાયરલ થયેલા વીડિયોમાં એરક્રાફ્ટની અંદરની ગંભીર સ્થિતિ જોવા મળી રહી છે. વીડિયોમાં એક પેસેન્જર અન્ય મુસાફરોને પૂછી રહ્યો છે કે, "શું એસી ચાલુ થયું?" ત્યારે બાકીના મુસાફરો એકસૂરે 'ના' પાડી રહ્યા છે. મુસાફરોનો આક્ષેપ છે કે એસી બંધ હોવા છતાં પ્લેનના કેપ્ટન દ્વારા ઉડાન ભરવાનું ક્લિયરન્સ આપી દેવામાં આવ્યું હતું. આ જોઈને મુસાફરો ઉશ્કેરાયા હતા અને તેમણે માંગ કરી હતી કે, "પ્લેનમાં ખામી છે, અમને બીજું એરક્રાફ્ટ આપો."

મેનેજરનો સ્વીકાર
આ વાયરલ વીડિયો અંગે રાજકોટ એર ઇન્ડિયાના મેનેજરનો સંપર્ક કરવામાં આવતા તેમણે સ્વીકાર્યું હતું કે આ વીડિયો આજનો જ છે અને દિલ્હી એરપોર્ટ પર આ ઘટના બની હતી.

દિલ્હી અને રાજકોટ બંને એરપોર્ટ પર મુસાફરો અટવાયા
આ ટેકનિકલ ખામી અને હોબાળાના કારણે માત્ર દિલ્હી જ નહીં, પણ રાજકોટ એરપોર્ટ પર પણ મુસાફરો પરેશાન થતા જોવા મળ્યા હતા:

દિલ્હી-રાજકોટ ફ્લાઇટ (AI 2537)
આ ફ્લાઇટ નિયમિત સમયે સાંજે ૫:૩૦ વાગ્યે દિલ્હીથી ઉપડીને ૭:૨૦ વાગ્યે રાજકોટ પહોંચે છે, પરંતુ હંગામા અને રિપેરિંગના કારણે તે ૩ કલાક મોડી પડી હતી.

રાજકોટ-દિલ્હી રિટર્ન ફ્લાઇટ (AI 2538)
દિલ્હીથી જ પ્લેન મોડું આવતા, રાજકોટથી રાત્રે ૮:૦૦ વાગ્યે ઉપડીને 9 વાગ્યે દિલ્હી જતી રિટર્ન ફ્લાઇટ પણ સાંકળ પ્રતિક્રિયા (Chain Reaction) ના કારણે મોડી પડી હતી, જેથી રાજકોટ એરપોર્ટ પર દિલ્હી જનારા મુસાફરો અટવાઈ પડ્યા હતા.